රවි ග්‍රහයා 2021 වසරෙහි ඔක්තෝබර් 17 වැනිදා ප.ව. 1.12ට තුලා රාශිය තුළ නීච චලිතයක් ආරම්භ කරන අතර 2021 වසරෙහි නොවැම්බර් 16 වැනිදා ප.ව. 1.03 දක්වාම තම නීච චලිතය පවත්වා ගෙන යයි. මෙම ග්‍රහ චලිතයට අනුව 2021 වසරෙහි ඔක්තෝබර් 17 වැනිදාත්, 2021 වසරෙහි නොවැම්බර් 16 වැනිදාත් අතර කාලසීමාව තුළ දේශපාලනයට සෘජුවම හෝ වක්‍රව සම්බන්ධ ඉතා  ප්‍රසිද්ධ, ප්‍රබල චරිතයකට මාරක අපල පවා ඇති වීමට ඉතා ඉහළ ඉඩක් හට ගන්නා බව පෙනේ.

 තවද මෙම ග්‍රහ ගෝචරයට අනුව 2021 වසරෙහි ඔක්තෝබර් 17 වැනිදායින් පසුව එළැඹෙන දින කිහිපය තුළ රහස් කුමන්ත්‍රණ ආදිය නිර්මාණය වන ග්‍රහ පිහිටීමක් නිරීක්‍ෂණය කළ හැකි අතර කෘෂිකාර්මික ක්‍ෂේත්‍රය සම්බන්ධ අහිතකර සිදුවීම් හට ගැනීමේ අවදානමක්ද, ආගමික ක්‍ෂේත්‍ර සම්බන්ධව අසුබදායක ආරංචි ලැබීමක්ද පෙන්නුම් කෙරේ. මෙම තත්ත්වය 2021 වසරෙහි නොවැම්බර් 16 වැනිදා දක්වාම අඩු වැඩි වශයෙන් පවතිනු ඇත. 

මෙම සතිය තුළ සිදුවන අනෙක් තීරණාත්මක ග්‍රහ මාරුව වන්නේ කුජ ග්‍රහයා 2021 වසරෙහි ඔක්තෝබර් 22 වැනිදා පෙ.ව 2.03ට තුලා රාශියට පිවිසීම වන අතර 2021 වසරෙහි දෙසැම්බර් 5 වැනිදා පෙ.ව. 5.58 වන තෙක්ම කුජ තුලා රාශිය තුළ හැසිරෙයි. ඒ අනුව කුජ සහ යුරේනස් සප්තම වීමට අනුව ඔක්තෝබර් 22 වැනිදායින් පසුව එළැඹෙන දින 5 තුළ රිය අනතුරු, වෙනත් හදිසි අනතුරු, ගිනි ගැනීම්, පොළොව සෙලවීම් ආදියෙහි වැඩිවීමක් පෙන්නුම් කරන අතර 2021 වසරෙහි දෙසැම්බර් 5 වැනිදා දක්වාම මෙම තත්ත්වය අඩු වැඩි වශයෙන් පවතිනු ඇත. තවද මෙම ග්‍රහ ගෝචරයට අනුව 2021 වසරෙහි ඔක්තෝබර් 22 වැනිදායින් පසුව එළැඹෙන දින කිහිපය තුළ අධ්‍යාපන ක්‍ෂේත්‍රය සම්බන්ධවද ආගමික උතුමන්ලා සම්බන්ධවද යම් තරමට හෝ අහිතකර ආරංචි පෙන්නුම් කරන අතර 2021 වසරෙහි දෙසැම්බර් 5 වැනිදා දක්වාම මෙම තත්ත්වය අඩු වැඩි වශයෙන් පවතිනු ඇත. තවද කුජ ග්‍රහයා මේ ආකාරයට තුලා රාශිය තුළ චලිත වීමට අනුව 2021 වසරෙහි ඔක්තෝබර් 22 වැනිදාත් 2021 වසරෙහි දෙසැම්බර් 5 වැනිදා අතර කාලසීමාව තුළ මෑත කාලයෙහි ජනතාව විසින් ප්‍රතික්‍ෂේප කළ පැරණිතම දේශපාලන පක්‍ෂයක නායකයකුට ජීවන ක්‍රමය හෝ රාජකාරි කටයුතු වෙනස් වන ආකාරයට අලුත් ආරංචියක් ලැබීමක් හෝ අලුත් සිද්ධියක් සිදුවීමක් පෙන්නුම් කෙරේ. සමස්ත ග්‍රහ ගෝචරයන්ට අනුව 2021 වසරෙහි ඔක්තෝබර් 22 වැනිදාත් 2021 වසරෙහි දෙසැම්බර් 5 වැනිදාත් අතර කාල සීමාව වඩාත් තීරණාත්මක වන්නේ මීන ලග්න හිමියන්ටය. ඒ පිළිබඳව දීර්ඝ ලෙස සාකච්ඡා කිරීමට මීළඟ ලිපියෙන් බලාපොරොත්තු වෙමු.

කුම්භ ලග්නය ලංකා කේන්දරයෙහි ධනස්ථානය සහ අයස්ථානය අධිපති ගුරු ග්‍රහයා 2021 වසරෙහි ඔක්තෝබර් 18 වැනිදා පෙ.ව. 11.01ට තම වක්‍ර චලිතයෙන් මිදී නිවෘත චලිතයකට පිවිසීමද සිංහ ලග්න ජනරජ කේන්දරයෙහි ධනස්ථානය සහ අයස්ථානය අධිපති බුධ ග්‍රහයා 2021 වසරෙහි ඔක්තෝබර් 18 වැනිදා රාත්‍රි 8.45ට තම වක්‍ර චලිතයෙන් මිදී නිවෘත චලිතයකට පිවිසීමද අනුව 2021 වසරෙහි ඔක්තෝබර් 18 වැනිදායින් පසුව රටෙහි ආර්ථිකය සම්බන්ධව යම් යම් සුබදායක ආරංචි පෙන්නුම් කරයි. නමුත් 2021 වසරෙහි ඔක්තෝබර් 22 වැනිදා කුජ මාරුව සිදුවන තත්කාල කේන්දරයෙහි කුජ ග්‍රහයා ධනස්ථානය තුළ තැම්පත් වීමට අනුව 2021 වසරෙහි ඔක්තෝබර් 22 වැනිදායින් පසුව එළැඹෙන දින කිහිපය තුළ ආර්ථිකය සම්බන්ධව යම් තරමකට අභියෝගවලට මුහුණ දීමක්ද පෙන්නුම් කෙරේ. 

මීට අමතර ලෙස ගුරු ග්‍රහයා තම වක්‍ර චලිතයෙන් මිදීමට අනුව 2021 වසරෙහි ඔක්තෝබර් 15 වැනිදාත් 2021 වසරෙහි ඔක්තෝබර් 20 වැනිදාත් අතර කාලසීමාව තුළ පූජ්‍ය පක්‍ෂයේ උතුමෙකුට හෝ රටම දන්නා වෙනත් ප්‍රසිද්ධ පුද්ගලයකුට විශේෂිත අපලයක් පෙන්නුම් කෙරේ.

(මව්බිම -17/10/2021) පාරින්ද්‍ර සුගතදාස