අතීත සමාජයට වඩා වර්තමාන සමාජයේ හෘදයාබාධවලට ගොදුරු වන ජන සඛ්‍යාව ඉතා ඉහළය. එසේ වීමට ප්‍රධානම හේතු කිහිපයක් ඇත. ඉන් පළමු හේතුව නම් මත්ද්‍රව්‍ය භාවිතයයි. දෙවැනි කරුණ නම් මේදය අධික ක්ෂණික ආහාර අනුභවයයි. තෙවැන්න මානසික පීඩනයයි. ව්‍යායාම මදිකමයි සිව්වැනි හේතුව වේ.

මේ කුමන හේතුවක් නිසා හෝ වැලඳෙන හෘදයාබාධ පිළිබඳව ඡ්‍යොතිෂමය දෘෂ්ටි කෝණයකින් බැලිය හැකිය. ලග්න කේන්දරයක හෘදවස්තුව පිළිබඳව කරුණුූ හෙළිදරව් කෙරෙන 5 වැන්න සහ එහි අධිපතිත්, හෘදයට කාරක රවි ග්‍රහයාත් සිංහ රාශියේ 6,8,12 දුෂ්ට ස්ථානාධිපතින්ගෙන් 22 වැනි දෙර්කාණාධිපති, 64 නවාංශකාධිපති, බාධක ස්ථානාධිපති යන ග්‍රහයන් වැඩි දෙනෙකුගේ දෘෂ්ටියෙන් හෝ සංයෝගයෙන් පීඩා වූ කල එවන් ග්‍රහ පිහිටීම් ඇති ජන්මීන්ට හෘදයාබාධ වැලඳෙන්නේය.

මෙහිදී හෘදවස්තුවට කාරක රවි ග්‍රහයාට හෝ රවි හිමි සිංහ රාශියට වේගවත් ග්‍රහයන් වන කුජ හෝ රාහුගේ අශුභ බලපෑමක් වේ නම් එවන් ග්‍රහ පිහිටීමක් ඇති ජන්මීන්ට හෘදයේ ගැස්ම හෙවත් හෘද ස්පන්ධනය ඒකක 100ට වඩා වැඩි වීම නිසා හෘදයාබාධ වැලඳෙන්නේය. එමෙන්ම මන්දගාමී ග්‍රහයන් වන ශනි කේතුගේ අශුභ බලපෑමක් සිංහ රැසට, එහි අධිපති රවිට වේ නම් එවැනි ග්‍රහ පිහිටීමක් ඇති ජන්මීන්ට හෘද ස්පන්දනය ඒකක 60ට වඩා අඩුවීම නිසා හෘදවස්තුව දුර්වල වීමෙන් හෘදයාබාධ වැලඳෙන්නේය. ඒවගේම පස්වැන්නට, පස්වැන්නාධිපතිට ගුරු ග්‍රහයාගේ අශුභ බලපෑමක් වේ නම් එවන් ග්‍රහ පිහිටීමක් ඇති ජන්මීන්ට රුධිරයේ කොලෙස්ටරෝල් වැඩිවීම නිසා හෘදවස්තුවට රුධිරය සපයන නහරවල තෙල් බැඳීම හේතු කොටගෙන හෘදයාබාධ වැලඳෙන්නේය.

ඉහත විග්‍රහ කළ ඡ්‍යොතිෂමය කරුණු අනුව ජන්මීන්ට වැලඳෙන හෘදයාබාධ පිළිබඳව පැහැදිලි අවබෝධයක් ලබා ගැනීමට උදාහරණ කේන්දර දෙකක් අධ්‍යයනය කරමු.

උපත 1949/02/05 රැ 9.30 මාතරදී බෙරණ නැකතේ 2 වැනි පාදයෙන් උපත ලබා ඇති හෙයින් සිකුරු මහ දශාව ඉදිරියට වර්ෂ 16යි මා 03යි දින 16ක් ශේෂව තිබුණි. ඉහත කේන්දරය අයත් වන්නේ හෘද රෝගයකින් පීඩා විඳින ජන්මියෙකුටය. එම කන්‍යා ලග්න කේන්දරයේ හදවත පිළිබඳ කරුණූු නිවේදනය කෙරෙන භාවයක් වන 05 වැන්න වූ මකර රැසෙහි හෘදය වස්තුවට කාරක රවි ග්‍රහයා සතුරුව සිටින්නේ මාරකවලට හිමිකම් කියන භාව දෙකක් වන 8 වැන්නෙහි සිටින රාහු සහ 2 වැන්නෙහි සිටින කේතුගේ කේන්ද්‍රීය දෘෂ්ටියට ලක් වෙමිනි. හෘද වස්තුවට කාරක රවි ග්‍රහයා තැන්පත් රාශි අධිපති ශනි හෘදවස්තුව නිවේදනය කෙරෙන භාවයක් වන 12 වැන්න වූ සිංහ රැසෙහි පීඩා වී සිටින්නේ 6 වැන්න වූ රෝග ස්ථානයේ පතිතව සිටින 8 අධිපති අඟහරුගේ සප්තම සහ 8 වැන්න වූ මේෂ රැසෙහි සතුරුව සිටින රාහුගේ පූර්ණ දෘෂ්ටියට ලක්වෙමිනි. ඒ අනුව එහි ග්‍රහ පිහිටීම ඉහත කන්‍යා ලග්න කේන්දර හිමියා හෘද රෝගියකු බවට පත් කිරීමට හේතුවී ඇත.
 

එනමුත් ඉහත කන්‍යා ලග්න කේන්දරයට ප්‍රබල යෝගකාරක ග්‍රහයන් දෙදෙනකු වන බුධ සහ සිකුරු ධර්ම කර්මාධිපති යෝගයක් උදා කරමින් පස්වැන්න වූ මකර රැසෙහි සිටීම බොහෝ දෙනාගේ ඇස රවටන සුලු ග්‍රහ පිහිටීමක් වන නිසා ඉහත කන්‍යා ලග්න කේන්දර හිමියා උගත්, බුද්ධිමත් , ධනවත්, බලවත් නිරෝගීමත් කෙනෙකු මිස හෘද රෝගියකු බව එකවර සිතීමට පෙලඹෙන්නේ නැත. එහෙත් එකී ධර්මකර්මාධිපති යෝගය දෙස තෙවැනි ඇසකින් බලන කල ධර්මකර්මාධිපති යෝගයට සම්බන්ධ බුධ, සිකුරු යන ග්‍රහයන් දෙදෙනා තැන්පත් රාශි අධිපති දුෂ්ට භාවයක් වන 12 වැන්නෙහි තැන්පත්ව පාප පීඩිතව සිටී. එම යෝගයට සම්බන්ධ ග්‍රහයන් දෙදෙනාගෙන් කෙනෙක් වන බුධ ග්‍රහයා ලග්න කේන්දරයේ වක්‍රව උච්ච ග්‍රහයකු මෙන් බලවත්ව සිටියත් සතුරු රවිට අස්තවීමෙන් දුර්වලවී ඇති බව නවාංශක කේන්දරයේ බුධ ග්‍රහයා පිහිටා ඇති ආකාරය අනුව අවබෝධ කර ගත හැකිය. එමෙන්ම එම යෝගයට සම්බන්ධ අනෙක් ග්‍රහයා වන සිකුරු ග්‍රහයා තැන්පත් නවාංශකාධිපති ශනි ලග්න කේන්දරයේ ඉහත විග්‍රහ කළ පරිදි දුෂ්ටභාවයක් වන 12 වැන්නෙහි පීඩාවීමත්, සිකුරු ග්‍රහයාගේ මුල ත්‍රිකේණය බලය ලබන තුලා රැස රාහු/කේතු සහ මාන්දි ගුලික යන ග්‍රහයන්ගෙන් පීඩාවීමත් යන කරුණුවලින් ධර්මකර්මාධිපති රාජයෝගය බලය හීන වී 12 වැන්නාධිපති රවිගේ පාප පීඩිත ග්‍රහ බලය වර්ධනය වී ජන්මියා හෘද රෝගියකු බව මනාව අවබෝධ වන්නේය.

දැන් අපි තවත් උදාහරණ කේන්දරයකට අවධානය යොමු කරමු. ඉහත කේන්දරය අයත්වන්නේ ව්‍යාපාරිකයකුටය. මොහු දැනට ජීවතුන් අතර නැත. ඔහු අවුරුදු 35දී පමණ අධික ලෙස මත්පැනන් පානය, තෙල් සහිත ආහාර අනුභවය කිරීම නිසා හෘදයාබාධයකට ගොදුරු විය . ඒ පිළිබඳ පහත දැක්වෙන ඔහු උපන් මිථුන ලග්න කේන්දරය අනුව කරුණුූ පරික්ෂා කර බලමු. උපත 1951/11/17 ශනිදා රාත්‍රි 8.17 කොළඹදී අද නැකතේ 3 වැනි පාදයෙන් උපත ලබා ඇති හෙයින් රාහු මහ දශාව ඉදිරියට වර්ෂ 6යි මාස 02යි දින 07ක් ශේෂව තිබුණි.
ඉහත කේන්දරයෙහි අප මාතෘකාව හා සබැඳි 5 වැන්න කෙරෙහි අපගේ අවධානය යොමු කර බලමු. 5 වැන්න වූ තුලා රැසෙහි අධිපති සිකුරු 22වැනි දෙර්කාණාධිපතිව පස්වැන්නෙන් 12 වැන්න හෙවත් සිව්වැන්න වූ කන්‍යා රැසෙහි නීචව රෝග ස්ථානාධිපති (6 අධිපති) සතුරු අඟහරු සහ මාරක ස්ථානාධිපති ( 8 අධිපති) සෙනසුරු සමඟ යෝගවෙයි. මෙය 10 වැන්නෙහි සිටින බාධක ස්ථානාධිපති (7 අධිපති) ගුරුගේ සප්තම දෘෂ්ටියට ලක්ව සිටීම හෘද රෝගයකට ගොදුරු වන බව පෙන්නුම් කෙරෙන ග්‍රහ බලයකි. එකී 5 වැන්නාධිපති තැන්පත් රාශි අධිපති බුධ රෝග ස්ථානයේ (6වැන්නෙහි) 3 වැන්න වූ සිංහයෙහි සිටින කේතුගේ සහ 9 වැන්න වූ කුම්භයෙහි සිටින රාහු, කේතුගේ කේන්ද්‍රීය දෘෂ්ටියෙන් පීඩා වෙයි. එමෙන්ම සිව්වවැන්නෙහි සිටින 6 අධිපති කුජගෙන් සහ 22වැනි දෙර්කානාධිපති සිකුරුගෙන් පීඩාවූ 8 අධිපති සෙනසුරුගේ පූර්ණ දෘෂ්ටියෙන් පීඩාවූ රවි සමඟ යෝගව සිටීම හෘද රෝගියෙක් බව ස්ථීර කෙරෙන ග්‍රහ පිහිටීමකි. මෙහිදී 5 වැන්නාධිපති මෙන්ම හෘද වස්තුවට කාරක රවි ග්‍රහයා දැඩි ලෙස පාපයන්ගේ ග්‍රහනයට හසුවීම ජන්මියා හෘද රෝගියෙක් බවට පත්වීමට හේතුවී ඇත. එමෙන්ම මිථුන ලග්න කේන්දරයට බාධක ග්‍රහයා වන ගුරු 10 වැන්න වූ මීනයේ වක්‍රව සිරුරේ රුධිරය නිවේදනය කෙරෙන භාවයක් වන සිව්වැන්නෙහි සිටින 5 වැන්නාධිපති දකී. එමෙන්ම 22වැනි දෙර්කානාධිපති සිකුරුට සප්තම දෘෂ්ටියෙනුත් 6 වැන්න වූ රෝග ස්ථානයේ සිටින හෘදවස්තුවට කාරක රවි සහ ලග්නාධිපති බුධත් පූර්ණ දෘෂ්ටියෙන් දැකීම, රුධිරයේ කොලසේට්‍රෝල් වැඩිවීමෙන් හෘද රෝගයකට ගොදුරු වීමට හේතු වූ බව පැවසිය හැකිය.