අත ගහන ගහන වැඩේ අවුල් වෙනවද? ව්‍යාපාරවලට යට කරපු මුදලවත් බේරගන්න බැරි වුණාද? ඉන්පසුව  හිටියටත් වැඩිය පහළට වැටුන ද? 

රැකියාවක් නැතිව ඉබාගාතේ යන්න සිද්ධ වෙලාද? සම්මුඛ පරීක්ෂණවලින්  අසමත්ද?

විදේශගතවීම් තිබෙනවාද? විදේශගත වුණත් ගිය පයින්ම ආපසු එන්න සිද්ධ වුණාද? ප්‍රේම සම්බන්ධතා බිඳ  වැටෙනවාද? විවාහයක් තිබෙනවාද? විවාහ වෙලා දික්කසාදයකින් අවසන් වෙලාද? අධ්‍යාපනයෙන් ඉහළටම  යනවද? නැතිනම් අධ්‍යාපනය කඩාකප්පල් කර ගත්තද? ගිහි ගෙය අතහැරියද? නැතිනම් නැවතත් පැවිදි  දිවියෙන් ගිහි ගෙයට ගියාද?

මෙවැනි ප්‍රශ්න ඔබටත් තිබෙනවාද? හිතාගන්නවත් බැරිව ඔබත් ලත වෙනවද?

එහෙම නම් අපි බලමු ඇයි මෙහෙම වෙන්නේ කියලා. ඔබේ ජන්ම පත්‍රයේ මෙවැනි අසාර්ථක වන පිහිටීම් ද  තියෙන්නේ කියල අපි බලමු.

ඔබේ ජන්ම පත්‍රයේ පිහිටීම කොහොමද කියලා මුලින්ම අපි බලන්න ඕනේ. මෙහිදී ලග්නාධිපති ග්‍රහයා ගැනත්  විශේෂ සැලකිල්ලක් දැක්විය යුතුයි. ලග්නාධිපති ග්‍රහයා ලෙස හඳුන්වන්නේ ලග්නයට අධිපති වන ග්‍රහයා ගැනයි. මුලින්ම ලග්නයෙන් ලග්නයට අධිපති වන ග්‍රහයන් හඳුනාගෙන සිටිමු.

මේෂ ලග්නයට කුජ ග්‍රහයාද, වෘෂභ ලග්නයට සිකුරු ග්‍රහයාද, මිථුන ලග්නයට බුධ ග්‍රහයාද, කටක ලග්නයට  සඳු ග්‍රහයාද, සිංහ ලග්නයට රවි ග්‍රහයාද, කන්‍යා ලග්නයට බුධ ග්‍රහයාද, තුලා ලග්නයට සිකුරු ග්‍රහයාද, වෘශ්චික ලග්නයට කුජ ග්‍රහයාද, ධනු ලග්නයට ගුරු ග්‍රහයාද, මකර ලග්නයට ශනි ග්‍රහයාද, කුම්භ ලග්නයට ශනි ග්‍රහයාද, මීන ලග්නයට ගුරු ග්‍රහයාද යන ආකාරයට තමන් උපන් වෙලාවේ පැවති වෙලාවට අනුව ලැබී ඇති ලග්නය අනුව ද මෙය බැලිය යුතුයි.

එහෙමනම් ඔබටත් ඔබේ ලග්නාධිපති ග්‍රහයා කවුරුන්ද කියා බැලීමට වැටහීමක් ඇති වෙන්න ඇති කියලා මම  හිතනවා.

ලග්නාධිපති ග්‍රහයා ඔබේ ජන්ම පත්‍රය තුළ සිටින ආකාරයත්, නවාංශක කේන්ද්‍රය තුළ සිටින ආකාරයත් පිළිබඳවසියුම් නිරීක්ෂණයකට එළැඹිය යුතුව ඇත.

ලග්නාධිපති ග්‍රහයාට වැටෙන ග්‍රහ දෘෂ්ටි සහ ඒවායේ තත්ත්වය ගැන ද, සංයෝග වී සිටින ග්‍රහයන්ගේ තත්ත්වය ගැන ද, නීච වෙලාද? අබල දුබල වෙලාද? වැටී ඇති අශුභ ග්‍රහ දෘෂ්ටි, අශුභ සංයෝග සහිතව ද ඉන්නේ කියලාත් ඉතා සියුම්ව ජන්ම පත්‍ර පරීක්ෂාවක් තුළින් බැලිය යුතු වෙනවා.

ඔබේ ජන්ම පත්‍රයේ අනිත් සියලුම ග්‍රහයන් ඉතාම බලවත්ව සිටියත් මෙම ලග්නාධිපති ග්‍රහයා අබල, දුබලව  පීඩිතව සිටිනවා නම් වඩුවාගේ ගෙදර පුටුව නෑ වගේ හැඟීමක් තමයි අපට ඇතිවෙන්නේ. ලග්නාධිපති ග්‍රහයා 06/08/12 යන දුෂ්ට ස්ථානයක තැන්පත්වෙලා ඉන්නවා නම් තමාගේ තත්ත්වය ලේසි පහසුවෙන් ගොඩනඟා  ගන්න පහසු වෙන්නේ නෑ.

ඒ වගේම කේන්ද්‍රස්ථාන හතරේම ග්‍රහයන් නැතිව පාළුවෙලා ගිහින් නම් ඒකත් මෙම අසාර්ථකත්වයට බලපෑම් ඇති කරන තත්ත්වයක් වෙනවා. තම ලග්න භාවයේ කිසිදු ග්‍රහයෙක් නොමැති නම්, ලග්නාධිපති ග්‍රහයා දුෂ්ට  ස්ථානගතවෙලා නම් තමාගේ තත්ත්වය, පෞරුෂත්වය ගොඩනඟා ගන්න අසීරු වෙනවා.

ඒ වගේම 04 වැන්නාධිපති 06/08/12 වැනි දුෂ්ට ස්ථානයක තැන්පත් වී සිටීමෙන්ද ඉතා අශුභ තත්ත්වයක් ඇති  කරනවා. 04 වැන්නේද ග්‍රහයෙක් තැන්පත් වී නොමැති නම් හෝ නීච හෝ පාපී ග්‍රහයෙක් එහි සිටී නම් තමන්ට  චංචල හෝ නිශ්චල දේපළ, යාන වාහන, ඉඩකඩම් අහිමි කරවන පිහිටීමක් වෙනවා. ඒවා ලබාගැනීමට බොහෝ බාධා මතු කරන පිහිටීමක් ද වෙනවා. මෙවැනි පිහිටීමක් තිබෙන පැවිදි අයෙකුට වුවත් ස්ථිර විහාරස්ථානයක් හෝ නොමැතිව දුෂ්කර භූමියක වැඩ වාසය කරන්නට සිදුවිය හැකියි. ගිහියෙක් නම් තම වත්කම්, ගෙවල්  දොරවල්, යාන වාහන පවා යම් දිනෙක අහිමි වී යන්න පුළුවන්. මෙවැනි අය අනවශ්‍ය ලෙස අන්‍යයන්ගෙන් මුදල් ණයට ගෙන ගෙවල් දොරවල් පවා ඇපයට තබා සියල්ල අහිමි කරගන්නවා.

ඒ වගේම 07 අධිපති ග්‍රහයා 06/08/12 වගේ දුෂ්ට ස්ථානයක සිටිනවා නම් අශුභ පිහිටීමක් වෙනවා. 07 වැන්නේ කිසිදු ග්‍රහයකු නොමැති වීම හෝ පාපී ග්‍රහයෙකු 07 වැන්නේ සිටීම, අශුභ දෘෂ්ටි, අශුභ සංයෝග නිසා විවාහය  කල්යෑම, විවාහය දෙදරා යෑම, විවාහ නොවී සිටීම, විවාහ සැපත අඩුවීම හෝ අතිදුෂ්කර ප්‍රදේශයකට විවාහ වී  පදිංචියට යෑම වැනි දේවල් සිදුවිය හැකියි.

ඒ වගේම 10 අධිපති ග්‍රහයා 06/08/12 වැනි දුෂ්ට ස්ථානයක සිටී නම් හෝ10 වැන්නේ කිසිදු ග්‍රහයෙකු  නොමැතිවීම, පාපී ග්‍රහයෙකු10 වැන්නේ සිටීම, අශුභ දෘෂ්ටි සහ අශුභ සංයෝග තුළින් දහවැන්න පීඩාවීම තුළින්  ද තම වෘත්තීය ජීවිතය පවත්වා ගෙන යෑමට අපොහොසත් වෙනවා. වෘත්තීමය දියුණුවක් නැති වෙනවා.

සතුරු බාධක, උගත්කමේ තරමට රැකියාවක් නොලැබීම දුරබැහැර පත්වීම්, විදේශ ගතවී සිටී නම් කිරීමට  අපහසු රැකියා වැනි දේවල් කරන්නට සිදුවෙන්න පුළුවන්.

මේ ආකාරයට කේන්ද්‍රස්ථාන හතරවන 01/04/07/10 යන ස්ථාන පීඩාවෙලා නම්, පාප දෘෂ්ටි, පාප සංයෝග  වැටී තිබෙනවා නම් තමයි මේ ආකාරයට කනගාටුදායක තත්ත්වයකට පත්වන්නේ.

ඒ වගේම ලග්න භාවයේත්, 02/12 යන භාවවලත් පාප ග්‍රහයන් තැන්පත්වෙලා නම් වඩාත් ප්‍රවේශම් විය යුතුව  තිබෙනවා.

නීච, පාපී ග්‍රහයන්ගෙන් ලග්නය පාප කර්තරීවෙලා නම් ජන්මියාට නිතර කේන්ති යන ආවේගශීලී ගති පහළ  වෙන ලක්ෂණ මතුවෙනවා. කරන කියන සෑම කටයුත්තකටම සතුරු බලවේග ඇති වෙනවා.

මානසික පීඩනය, හිසේ කැක්කුම කරන කියන දේ අසාර්ථක වීම සහ මානසික කඩා වැටීම වැනි දේ සිදු වෙන්න පුළුවන්.

ඒ වගේම තම නිවසේ නිදන කාමරය පිහිටි දිශාව, ළිඳ තිබෙන දිශාව, මුළුතැන්ගෙය තිබෙන දිශාව වැනි නිවාස  ඉදිකිරීමේ දී සිදුවන වැරදි දිශාගත කිරීම් නිසා ද තම කටයුතු අසාර්ථක වීමට ඉඩ ඇත.

ඒ වගේම ගත කරන මහ දශා හා අන්තර් දශා අනුව ද අසාර්ථක වීම් සිදුවෙන්න පුළුවන්. ඒරාෂ්ඨක කාල ගත  කරන අයට ද මෙම තත්ත්වය ගොඩාක් දරුණු ලෙස බලපෑම් ඇති කරනවා.

මෙම කරුණු සියල්ල අවධානයට ගත යුතුව තිබෙනවා. එහෙම නම් ඔබත් ඔබගේ ජන්ම පත්‍රය නිවැරදිව පරීක්ෂාකරවාගෙන, නිවසේ ඇති වාස්තු දෝෂ පරීක්ෂා කරවාගෙන ඒවායේ දෝෂ ඇතිනම් එම දෝෂවලට නිවැරදිව  ප්‍රතිකර්ම කිරීම තුළින් ජීවිතය සාර්ථක මඟකට ගෙන යෑමට ඔබටත් අපහසු වන්නේ නැත.

ඔබට වාසනාවන්ත සාර්ථක ජීවිතයක් ගත කරන්න ශක්තිය ධෛර්යය ලැබේවා !