සතුරු පීඩාවන්ට ලක්කරන ප්‍රධාන ද්වාරයේ වේධ දෝෂයන්
ප්‍රධාන උළුවස්සට කෙළින් ඉදිරියෙන් කොන්ක්‍රීට් කණුවක්, පොඩියට පවතින උස බිත්තියක කණුවක්නිසා ඇතිවෙන දෝෂය නම් ස්ථම්බ වේධ දෝෂයයි. මෙය බොහෝ නිවෙස්වල දක්නට ඇත. එවන් තත්ත්වයකදී එම නිවසට සතුරුහානි, සතුරු පීඩා, සතුරු කරදර තත්ත්ව ඇති කරයි.
මේලෝකය තුළ ජීවත්වන සියලුම ජීවීන් තම ජීවිත කාලයගෙවන්නේ තමන් ගැනත් තම සමීපයන් වන බිරිඳ, දරුවන් ගැන නිතරම බියකිනි. මනුෂ්‍යයාගේ පටන් පක්ෂීන්, සිව්පාවුන් වැනි දියගොඩ වෙසෙන සියලුම සතුන් තම ජීවිතය ගැන බියක් දරයි. මට කුමක් වෙයි ද මොනාකාරයේ සතුරු පීඩාවක් පැමිණේද යන්න බිය පවතී. එසේම අප ජීවත් වනසමාජය තුළ වර්තමානයේ පමණක් නොව මිනිස් පරිණාමයෙන් පසුව එකෙක් පරයා තව කෙනකු කුමන අංශයකින් හෝ කුමන මාර්ගයකින්තමන්ගේ ජන්ම වාසනාව සමග ඉහළට නැඟී සිටීමට වෙරදැරීමේදී ඔහුට හෝ ඇයට එය වළකාලන්ට විරුද්ධවාදී වන්න බොහෝ සතුරන් ජනිත වේ. මෙය අපට, ඔබට පමණක් සීමා වූ දෙයක් නොව අපගේ ශාස්තෘන් වහන්සේ වන බුදුරජාණන් වහන්සේට පවා තම මස්සිනා වූ දේවදත් සතුරු ක්‍රියා කළේය. උන්වහන්සේව විනාශ කිරීමට නොයෙක් උපක්‍රම යෙදීය.
මනුෂ්‍ය වර්ගයේ ගැලවීම උදෙසා මෙලොවට ජනිත වූ යේසුස් ක්‍රිස්තුස් වහන්සේව තමන්ගේ ගෝලයකු වූ ජුදාස් විසින්පවා දී කුරුසිය මත ඇණ ගසා උන්වහන්සේව ජීවතක්ෂයට පත්කළහ. එසේ එවන් ශ්‍රේෂ්ඨ ශාස්තෘන්ටත්සතුරු පීඩා පැවතියා නම් සාමාන්‍ය මනුෂ්‍යයන්වන අප හට කුමන කතාද? නිවසක් සම්බන්ධයෙන් බැලීමේදී මනුෂ්‍යයන් තම ජීවිත කාලයෙන්වැඩි කාලයක් ගෙවන්නේ තමන්ගේ නිවස තුළය. එම නිසා තමන්ජීවත්වන නිවසේ ශුභාශුභ තත්ත්වයන් තමන්ගේ ජීවිතය පුරාවට තමන් හට බලපෑම් ඇතිකරනු ඇත. ඒ වගේම නිවසක ප්‍රධාන ද්වාරය හෙවත් මංගල උළුවස්ස එම නිවසේ සුවිශේෂී ස්ථානයයි. නිවසේ ප්‍රධාන උළුවස්ස එම නිවසේ ගෘහමූලිකයාව නියෝජනය කරයි. ගෘහමූලිකයාගේ ආර්ථිකය, නිරෝගීකම, විවාහය, පෞරුෂත්වය, දියුණුව නියෝජනය කරයි. මෙය එනම් ප්‍රධාන උළුවස්සට වේධ වීම් හෙවත් බාධා වීම් නිසා සතුරු උපද්‍රව ඇතිවේ.
මා ප්‍රථමයෙන් ප්‍රකාශ කළාසේ සතුරු පීඩා කාටත් පොදු වුවද සතුරන්ගේ සැලසුම් පීඩා හානිකිරීම් සැමට එක සේ බලනොපවතී. එයට හේතුව එක එක පුද්ගලයා සතු කුසල් අකුසල් ශක්ති ප්‍රමාණයන් මතයි. නමුත් නිවසක ප්‍රධාන උළුවස්සෙහි පිහිටීම අනුව ශුභ ශක්තීන් ඇතුළුවී නිවෙසේ ගෘහ හිමියාගේ ශක්තිය ශුභාකාරයට පත්වීමෙන් ඔහු බපලවත් වන අතර ඔහුට විරුද්ධව කුමන අයකු නැඟී සිට විරුද්ධවාදීකම් කිරීමට පෙලඹුණ ද ඒවා අසාර්ථකවේ. නමුත් ප්‍රධාන උළුවස්ස තුළින් පැමිණෙන ශක්තීන් දුර්වල නම් අශුභ නම් ඒවා බාධා ඇතිකිරීමට පොලඹවයි නම් එම පුද්ගලයාගේ ශක්තිය, ඕරාව දුර්වල තත්ත්වයකට පත්වේ. ක්‍රම ක්‍රමයෙන් දුර්වල සෘණ ශක්තීන්ගෙන් ආරෝපිත වීම නිසා ඔහුට නොයෙක් පීඩාවන්ට මුහුණ දීමට සිදුවේ. එසේ නම් අද පෙන්වා දීමට යන්නේ ප්‍රධාන උළුවස්ස වේධ වීම හෙවත් බාධා වන අවස්ථාවන් නිසා එම නිවසට බලපාන සතුරු පීඩා ඇති කරවන වේධ දෝෂ කීපයක් ගැනයි.
බ්‍රහ්ම වේධ දෝෂය
නිවසේ ප්‍රධාන උළුවස්ස සෘජුවම බ්‍රහ්ම පාදයට යොමුවීම හෙවත් බ්‍රහ්ම පාදයේ මධ්‍ය රේඛාව (බ්‍රහ්ම පාද ලක්ෂ්‍යයේ) ප්‍රධාන උළුවස්ස මැදින් ගමන් කිරීම බ්‍රහ්ම වේධදෝෂයයි. ඒ වගේම අසල නිවසක උළුවස්සක් හරියටම ප්‍රධාන උළුවස්සට කෙළින්ම පැවතීම ද මෙයට අයත්වන අතර මේ තුළින් සතුරුබිය ද සතුරු පීඩාද ඇති කිරීමට මෙය හේතුවක් වනවා.
රජතවේධ දෝෂය
නිවසේ ප්‍රධාන දොරට අභිමුඛව රෙදි අපුල්ලන, තොටමුණක් අද වන විටමෙම කාර්යයන් අඩුවුණ ද සමහර රෝහල්, ඇඟලුම් ආයතනවල, විවිධ සේවා ස්ථානවල රෙදි කොන්ත්‍රාත් පදනමට රැගෙන සෝදා පිරිසිදු කරන ස්ථාන පවතී. මෙම ස්ථානයක් නිවසේ ප්‍රධාන දොරකෙළින්ම පැවතීම රජක වේධ දෝෂය ගණයට අයත් වේ. මෙය මෙසේ පැවැතීම නිවසේ සතුරු කරදර පීඩාවලට හේතුවක් වන්නේය.
ගණිකාවේධ දෝෂය
පුරාණයේ පටන් පැවැති නගර ශෝභනියන්ගේ සේවා සපයන ස්ථාන අදටත් මේ නමින් නොවුණද විවිධාකාර මුහුණුවරකින් ලංකාව පුරාම පවතී. කුමණාකාරයෙන් හෝ මෙවැනි ස්ථානපැවැතීම තුළින් ප්‍රායෝගික ගැටලුමතුවීම නම් ඕනේ තරම් සිදුවේ. ඒ වගේම එවැනිස්ථානයක් නිවසක ප්‍රධාන උළුවස්ස ඉදිරියෙන් පවතී නම් එය ගණිකාවේධ දෝෂයකි. එය සතුරු පීඩා, සතුරු කරදරවලට පත්වන ප්‍රධානතම දෝෂයකි.
මාර්ගවේධ දෝෂය
නිවසේ ප්‍රධාන උළුවස්සට කෙළින් මාර්ගයක් වැටී එය වංගුවක ආකාරයෙන්ප්‍රධාන උළුවස්ස අභිමුඛව පැවැතීම මෙම වේධ දෝෂයයි. එලෙස පැවැතීම නිසා එම නිවසේ සතුරුපීඩා, සතුරු කරදර හට ගන්නා ස්වභාවයක්ඇති වනු ඇත.
කුම්භාකාරවේධ දෝෂ
ප්‍රධාන උළුවස්සට කෙළින්ම උළු පෝරනු, ගඩොල් පෝරනු, වළං පෝරනු මෙවැනි නිෂ්පාදන අලෙවියට ඇති ස්ථාන පැවැතීම නිසා මෙම කුම්භාකාර දෝෂ ඇතිවේ. මේ වෙළෙඳසල් යනු පොඩියට පවත්වාගෙන යන කුඩා වෙළෙඳසල්නොව විශාල වශයෙන් මෙම හිස් කළගෙඩි වැනි දෑ අලෙවි කරන ස්ථානයන්ය. කෙසේ වුවද හිස් කළගෙඩි වැනි දේ දැකීම එතරම්ශුභ නැති බව පුරාණ සමාජයේද මතයන්වී තිබේ. මේවා නිසා නිවසේ ඇතිවෙන දෝෂ තත්ත්වයෙන් එම නිවසේ සතුරුහානි, සතුරු පීඩා, සතුරු බිය ඇතිවේ.
මිලේච්ඡවේධ දෝෂය
බුදුන්වහන්සේ විසින් ද අසත් පුරුෂයන්ඇසුර ජීවිතයට විනාශකාරී දෙයක් බව පෙන්වා දීතිබෙනවා. අධර්මිෂ්ටයන්, අසත් පුරුෂයන්, පහත් අදහස් පවතින අය තමන්ගේ පරම්පරාවල්වලට නොගැළපෙන අය, නොයෙක් රෝගාබාධයන් විශේෂයෙන් සුව නොවන, බෝවන රෝගීන්ගේ වෙසෙන ස්ථානයන් තමන්ගේ ප්‍රධාන උළුවස්සට කෙළින් පැවැතීම මිලේච්ඡවේධ දෝෂයකි. ඒවායින් පැමිණෙන අශුභ සංඛ්‍යාතයන් නිවසේ සොර සතුරු පීඩා, සතුරු උපක්‍රම, සතුරු කරදරවලටත් ඒවා ඇතිවීම කෙරෙහිත් බලපානු ඇත.
වර්චස්ථානවේධ දෝෂය
පොදුවැසිකිළි, කුණු කන්දවල්, වැසිකිළි වළවල්, කැසිකිළි, අපිරිසිදු ස්ථාන මෙම නමින් හඳුන්වයි. එවැනි ස්ථාන නගරබදව බහුලව දක්නට ඇත. මෙවැනි ස්ථානවලින් ප්‍රායෝගිකව ඩෙංගු, මැලේරියා, වෛරස් වැනි සතුරන්ගේ පීඩා ප්‍රසිද්ධියේම දක්නටඇති අතර, මෙවැනි ස්ථානයන් නිවසේ ප්‍රධාන උළුවස්ස අභිමුඛව පැවැතීම නිසා සතුරු කරදර, සතුරු පීඩා,රහස් සතුරන් නිර්මාණය වේ.
කෝණවේධ දෝෂය
පාළුවට ගිය භූමියක කෝණ නිවසක්, මංසන්ධියක්, නගරයක, ග්‍රාමයක සන්ධියක්, පාළු භූමියක, නිවසක කොනක් නිවසක ප්‍රධාන උළුවස්සට කෙළින් පැවැතීම කෝණවේධ දෝෂය වේ. මෙවැනි දෝෂයක් හට ගැනීම නිසාඑම නිවසේ සතුරු පීඩා, සතුරු උපද්‍රව හටගැනීම ඇතිකරයි.
ස්ථම්භවේධ දෝෂය
ප්‍රධාන උළුවස්සට කෙළින් ඉදිරියෙන් කොන්ක්‍රීට් කණුවක්, පොඩියට පවතින උස බිත්තියක කණුවක්නිසා ඇතිවෙන දෝෂය නම් ස්ථම්බවේධ දෝෂයයි. මෙය බොහෝ නිවෙස්වල දක්නට ඇත. එවන් තත්ත්වයකදී එම නිවසට සතුරුහානි, සතුරු පීඩා, සතුරු කරදර තත්ත්ව ඇති කරයි.
මෙම වේධ දෝෂ සතුරු කරදරයන් පමණක් නොව ධන හානි, සාමය කඩවීම, අඹු සැමි ආරවුල්වලට ද හේතුවේ. නමුත්මෙහිදී ප්‍රධාන වශයෙන්මාතෘකා කර ගත්තේ ප්‍රධාන ද්වාරයේ පවතින ප්‍රධාන වේධදෝෂ 18න් සතුරු පීඩාවන්ට ගොදුරුවන මෙම වේධ දෝෂයන් කීපය පමණි. මෙයට අමතරව තව බොහෝ වාස්තු දෝෂ නිවසක සොර සතුරු පීඩා කෙරෙහි පවතී.
Advertisements
