මේෂ

අතහැර දමා තිබුණු යම් යම් වැඩ කටයුතු ආරම්භ කිරීමට ශුභ යහපත් කාලයක් මේෂ ලග්න හිමි ඔබට උදාවී ඇත. රැකී රක්ෂාවන් නැවතී තිබුණේ නම් ඒවා නැවත ලැබීමට ඉඩ ඇත. දබර කිරීම් මත හෝ විරුද්ධකම් මත අයිතිවාසිකම් අහිමිව තිබූ යම් දෙයක් ලැබීමටද හැකිය. තමාගේ දියුණුවට කටයුතු සැලසේ. වෙනත් උරුමකරුවන්ටද සුළු සුළු ලැබීම් තිබුණත් තමාගේ කොටස හෝ අයිතිය නිරවුල්ව ලැබේ. එහෙත් වංචා ප්‍රයෝගවලට හසුවීමේ හැකියාවක් ඇති විය හැකිය. එයින්ද යම් ලාභයක් ලැබීමට පුළුවන. වංචාසහගත වැඩ හෙළිදරව් වීමටත් ඒවා ප්‍රසිද්ධ වීමටත් හැකි බැවින් කල්පනාවෙන් වැඩ කරන්න. යම් දෙයක වැරදිකරු තමා යැයි තීන්දුවීමක් දැකිය හැකිය. උසාව්යකට ඉදිරිපත්වීමට ඉඩ ඇති බවක්ද පෙනේ. ගමන් බිමන් අධික වේ. එක තැනක සිටීමට අකමැති වේ. ජීවිතයේ අලුත් කාලපරිච්ඡේදයක ආරම්භය වේ. සමහර විට තිබුණු වාසනාව නොපිට පෙරළෙනු ඇත. දේශපාලනයේ නියුතු අයට ඉතා අශුභයි.

ශුභ දිනය - සඳුදා

ශුභ වර්ණය - සුදු පාට

ජය අංක – 07, 15

වෘෂභ

දිගින් දිගටම පවතින කනගාටු ගතියක් වෘෂභයෙන් පෙන්නුම් කරයි. මිල මුදල් අතින් නිතරම අගහිගතා පැවැතිය හැකි සතියකි. දරුවන්ටද එතරම් ශුභ බවක් නොපෙනේ. දුර පළාතකට ගමන් කිරීමක් යෙදෙනු ඇත. වැඩිහිටියන්ටද ස්වාමියන්ටද යටත් වීමට සිදුවනු ඇත. හිතවත් ඥාතියකුට තරමක් අපලයි. කල - කෝලාහලවලින් දුරස්ව සිටින්න. හදිසි අනතුරු, උසකින් වැටීම් සිදුවිය හැකි බැවින් බොහෝ කල්පනාකාරීව විසීම යහපති. බොරු චෝදනාවලට ලක්විය හැකිය. බලාපොරොත්තු බිඳ වැටීමට ද ඉඩ ඇත. තිබුණ පළිගැනීම තරමක් අඩු වී යා හැකිය. සතුරු කරදර නිසා ස්ථාන හැරයෑමකට සිත් වේ. මිත්‍රයකු සම්බන්ධව අශුභ ආරංචියක් අසන්නට සිදු වේ. අශීලාචාර අයකුගෙන් අපහාසයක් හෝ කරදරයක් විඳීමට සිදුවනු ඇත. ඥාතීන්, ස්ත්‍රීන් තමා ගැන සතුටට පත්වේ. සුළු වශයෙන් හෝ වස්තු ලාභයකට හේතුයි. අන්සතු වස්තුවක් හිමිවීමට ඉඩ ඇත. මව ඇසුරේ වැඩි කාලයක් ගෙවීමට සිදුවිය හැකිය. මවගෙන් උපකාරද ලැබේ.

ශුභ දිනය - අඟහරුවාදා

ශුභ වර්ණය - රතු පාට

ජය අංක - 03, 12

මිථුන

පෙර තිබුණු තත්ත්වයට වඩා දියුණුව කරා ගමන් කිරීමේ හැකියාවක් මිථුන ඔබට මෙම සතියේ ඇති වේ. විශේෂයෙන්ම ලැබීම් පක්ෂය ඉහළ යනු ඇත. මුදල් අතින් අගහිඟකම් අඩුවීමට නියමයි. තෑගි බෝග ලැබීම් මෙන්ම ලබාදීම්ද සිදුවිය හැකිය. රෙදිපිලි ඒ අතර ප්‍රධාන වේ. විටෙක නපුරු වැඩ කිරීමටද සිතයයි. අධර්මයෙන් පවා යම් යම් ලාභ සොයන, ලැබෙන කාලයකි. ස්ත්‍රී - පුරුෂ හිතවත්කම්, බැඳීම් තරවෙනු ඇත. පෙම් සබඳතාවලට හේතුයි. විවාහ අපේක්ෂාවෙන් සිටි අයගේ බලාපොරොත්තු ඉටුවීමට ඉඩ ඇත. අලුත් මිත්‍රයන් ඇති වේ. ගේ දොර ඉඩකඩම් ආදී ලාභ ලැබීමට ඇති අවකාශ බොහෝය. රැකියා තනතුරු ස්ථීර වන ලකුණු යෙදේ. ජීවිතයේ දීප්තිමත් කාලයක ආරම්භය සිදුවේ. උසස් මිත්‍රයන්ගේ ඇසුර ලැබීමටද පුළුවන. මහන්සියෙන් කළ වැඩ කටයුතුවල ප්‍රතිඵල ලැබෙන සතියකි. ගොවිතැනින් විශේෂ වාසි ලැබිය හැකි බැවින් ගොවි මහත්වරු ඒ සඳහා උනන්දුවීම වටී. තමාට හෝ පවුලේ ළඟම ඥාතියකුට දරු ලාභයක් ඇති වීමට නියමයි.

ශුභ දිනය - බ්‍රහස්පතින්දා

ශුභ වර්ණය - සුදු පාට

ජය අංක - 09, 27

කටක

සේවා ස්ථානයේ ප්‍රධානියා සමඟ හෝ සමාජයේ වෙනත් උසස් අයකු හා බඟින් බස් වීමක් හෝ ආරවුලක් ඇතිකර ගැනීමක් කටකයෙන් පෙන්නුම් කරයි. එසේම තම සේවකයන් සමඟද ගැටලු ඇතිවිය හැකිය. යටත් සේවකයන්ගේ සේවය නිසි ආකාරයෙන් සිදු නොවන්නට ඉඩ ඇත. ශරීරයේ අසනීප ගති මතු වීමට කරුණු යෙදේ. අලුත් වැඩක් හෝ රැකියාවක් සොයා මහන්සි වීමට සිදුවේ. අයහපත් අය හා ඇසුරට වැටීමේ වැඩි ඉඩක් පවතියි. කවුරුන් හෝ තමාට විරුද්ධව කේලාම් කීමක් නිසා තද සිත්තැවුලක් ඇති විය හැකිය. නරක සිරිත් විරිත්වලට ඇබ්බැහිවීමට ඉඩ ඇත. මේ අතරම කරගෙන යන යම් වැඩකින් සැනසීමක් ලද හැකිවේ. ලද පමණින් සතුටු විය යුතු සතියකි. විශාල ආයෝජනවලට එතරම් ශුභ නොවනු ඇත. රසවත් කෑම බීම ලැබීමට ද ඉඩ ඇත. රැකී රක්ෂාවල් යහපත් වන්නේ වී නමුදු වියදම ඉහළ යා හැකිය. ඉගෙනීමේ කටයුතුවලට බාධ ඇති විය හැකි බැවින් දැඩි උනන්දුවක් උත්සාහයක් ඇතිකර ගැනීම වටී.

ශුභ දිනය - සිකුරාදා

ශූභ වර්ණය - ළා නිල්

ජය අංක - 06, 15

සිංහ

අපේක්ෂිත ලාභ නොලැබී යන, ඇතිකරන තිරිසන් සතුන්ට විපත්තිකර කාලයක් සිංහ ලග්න හිමි ඔබට අත්විඳීමට සිදුවේ. මිල මුදල්වලින් අසීරු සතියකි. ගමන් බිමන්වලදී කරදර අනතුරු සිදුවිය හැකි බැවින් ප්‍රවේශම් විය යුතුය. නීතියෙන් කරදර ඇති සිංහ වීමට ඉඩ ඇත. ප්‍රයෝජනයක් නැති දෙයකට මහන්සි වීමට සිදු වේ. යම් අසනීපයකටද හේතුයි. දුකද කනගාටුවද වරින්වර ඇති වේ. මවුපිය වැඩිහිටියකුට හෝ හිතවත් අයකුට තරමක් අපලයි. ගෙදරින් පිටවීමට සිතේ. ස්ථානය හැරයෑමට බොහෝ ඉඩ ඇත. ගුරුවරයකුගේ අසනීපයක් ගැන ඇසීමට සිදුවේ. තැන්පත් ධනයටද හානි වේ. අය-වැය තුලනය කරගැනීමට උනන්දු වන්න. ඊර්ෂ්‍යාකාරයන් වැඩිවේ. හොඳ මුහුණ පෙන්වා යටින් උගුල් අදින්නන්ගේ වැඩිවීමක් දැකිය හැකිය. හෘදයාබාධයක් වැනි රෝගයක් ඇතිවිය හැකි බැවින් ඒ ගැන අවධානය යොමු කරන්න. මිත්‍ර ඇසුරක්ද තෑගි බෝග ලැබීමක්ද විය හැකිය. වාද විවාදවලන් ජය අත්වේ.

ශුභ දිනය - සඳුදා

ශුභ වර්ණය - දම් පාට

ජය අංක - 07, 16

කන්‍යා

උසස් අය හා අමනාප වීමක්, මත භේද ඇතිකර ගැනීමක් පෙන්වන සතියකි. කන්‍යා ලග්නයෙන් ඇති වීමට හේතුයි. කරදර අධික වේ. ලැජ්ජාවක් හෝ අවනම්බුවක් විඳීමට කරුණු යෙදේ. තනිවී සිටීමට සිදු විය හැකිය. ණය වීමට හෝ තිබෙන ණය ගෙවා ගැනීමේ අපහසුතා මතුවේ. වෙහෙසකර දුර ගමනකට හේතුයි. ඒවා නිෂ්ඵලවීමටද ඉඩ ඇත. දෛනික වැඩකටයුතුත් වෙළෙඳ ව්‍යාපාර ආදියත් ඉතා දුකසේ දැඩි පරිශ්‍රමයකින් කරගෙන යෑමට සිදුවිය හැකිය. එසේ වුවද අවසානයේ එයින් මහත් ප්‍රයෝජන ලැබීමට හේතුයි. නියම පෝෂදායි ආහාර ලැබීමේ අඩුවක් පවතියි. පවුලේ කිහිපදෙනකුටම අසනීප වලින් පෙළීමට සිදු විය හැකිය. සමහර විට එම අසනීප අමුතු ඒවා විය හැකිය. සතිය මැද පමණ වන විට ශරීර සෞඛ්‍යය යහපත් අතට හැරී වාසනාව උදාවීමට පුළුවන, ලොකු මුදල් ලාභයක් ලැබීමට ඉඩ ඇත. එය අනුන්ගෙන් ලැබීමක් හෝ හදිසි ධන ලාභයක්

ශුභ දිනය - බ්‍රහස්පතින්දා

ශුභ වර්ණය - ක්‍රීම් තට

ජය අංක - 09, 36

තුලා

අලාභහානි, කල-කෝලාහල, සතුරුබිය සහිතව ඔබට මෙම සතිය ගෙවීයනු ඇත. මිතුරන් සමඟ ආරවුල්ද පැන නඟිනු ඇත. සිත් තැවුල් ඇති වීමට නියමයි. යටිබඩේ හෝ ඇස්වල අපහසුතා ඇතිවිය හැකිය. හදිසි අනතුරුවලින් ප්‍රවේශම් විය යුතු සතියකි. අඹුදරුවන් සමඟ ගැටලු මතුවිය හැකිය. නිවස තුළ ඉවසීමෙන් කටයුතු කිරීම වටියි. සිතේ සැනසීම අඩු වී යා හැකිය. ගොවිතැන් කටයුතු අසාර්ථකවීම හෝ පාළුවී යෑමක් දැකිය හැකිය. නිෂ්ඵල ගමන් බිමන් යෙදෙනු ඇත. හමේ රෝග, කුෂ්ඨ රෝග, කැසීම් වැනි තත්ත්වයන් ඇතිවිය හැකිය. යම් ලාභයක් ලැබෙන්නේ නම් ඒ සුළු සුළු ලාභ විය හැකිය. බලාපොරොත්තුවූ දෙයක් ලැබේ. එයින් යම් පමණකට සිතේ සතුටක් ඇති වේ. මහන්සි වී වැඩ කිරීමට සිදුවේ. ලෙඩෙක් හෝ ලෙඩක් පිළිබඳ කතිකාවක් ඇති විය හැකිය. සේවකයකුගෙන් හෝ පහත් අයකුගෙන් යම් වැඩක් කර ගැනීමට සිදුවේ. සති මැද හොඳ ප්‍රණීත සංග්‍රහයක් භුක්ති විඳීමට හැකි වේ. සතුරන් පරදා ජය ලැබීමකට හේතුයි.

ශුභ දිනය - සඳුදා

ශුභ වර්ණය - සුදු පාට

ජය අංක - 33, 51

වෘශ්චික

වාසනාවන්ත සතියක ආරම්භය වෘශ්චික ලග්න හිමියන්ට උදා වේ. ශරීර සනීපය ඇති වේ. රැකියාවන් ලැබීමටද කරන රැකියා සතුටින් තෘප්තියෙන් කරගෙන යෑමටද හැකි වේ. පංචකාම සම්පත්තියම තමාට රිසිසේ භුක්ති විඳීමට භාග්‍යය උදාවිය හැකිය. උත්සව ප්‍රිය සම්භාෂණ ආදියට සහභාගි වනු ඇත. සතුරු කරදර පහව යන ලකුණු. ණයට දුන් මුදලක් ලාභ සහිතව ලැබීමට නියමයි. තනතුරු ලැබීමේ වාසනාව ඇති සතියකි. ස්ත්‍රී-පුරුෂ ආශ්‍රය වැඩිවේ. ප්‍රේම සම්බන්ධතාවලට ශුභයි. විවාහ සහකරුගේ ආලය නොඅඩුව ලැබේ. ආදායම හොඳ වේ. වියදම් අඩු සතියකි. තරග විභාග ආදියෙන් ජයගත හැකිය. තමාගේ ප්‍රකාශන අන් අය විශ්වාස කරන හෝ පිළිගන්නා කාලයක් බැවින් නිවැරදි දේ පමණක් ප්‍රකාශ කිරීම වටියි. තමාට අවශ්‍යව තිබුණු බඩු මුට්ටු මිලදී ගැනීමට ශුභ සතියකි. මෙහෙකරුවන් අපේක්ෂාවෙන් සිටියේ නම් බලාපොරොත්තු ඉටුවේ. සාමාන්‍ය සැප විඳීමට භාග්‍යය හිමි වේ. සතුටුදායක ආරංචි ලැබේ.

ශුභ දිනය - බදාදා

ශුභ වර්ණය - කොළ පාට

ජය අංක - 24, 33

ධනු

ඉවසිලිවන්තව කටයුතු කළ යුතු තරමක අපලකාර් අවධියක් ධනුවට උදාවන බවක් පෙන්නුම් කෙරේ. ආදායම් ලැබීම අතින් මෙම සතිය යහපත් යැයි කිව නොහැකිය. කරදරවල පැටලීමේ නිමක් නැතිවිය හැකිය. නිකරුණේ ආරවුල් මතුවිය හැකිය. දරුවන්ටද තරමක අපල කාලයකි. සමහරවිට අඹුදරුවන්ගෙන් ඈත්ව සිටීමට සිදුවිය හැකිය. පිට පළාතකට ගොස් වාසය කිරීමටද සිත් වේ. දරුවකු ගෙදරින් පිටව යෑමටද ඉඩ ඇති සතියකි. නඩු හබ ආදියෙන්ද ජය අත්වීමක් දැකිය නොහැකය. උදරාබාධයක් ඇති වීමට ඉඩ ඇති බැවින් ඒ පිළිබඳව සැලකිලිමත් වන්න. බෝවන රෝග, වසංගත වෛරස් රෝගවලට පහසුවෙන්ම ගොදුරුවිය හැකි බවක් පෙන්නුම් කෙරේ. රැවටීමකට මුලාවීමකට ලක්විය හැකිය. හදිසි ගමන් බිමන් අධික වේ. ආදර බන්ධන ඇතිවිය හැකි සතියකි. අලුතින් යම් කටයුතු කිහිපයක් ආරම්භ කිරීමට සිදුවේ. තම උගත්කමද හපන්කමද රටට ලෝකයට පෙන්වීමට ඉඩ ලැබෙන බවක් පෙනේ.

ශුභ දිනය - බ්‍රහස්පතින්දා

ශුභ වර්ණය - කහ

ජය අංක - 09, 54

මකර.

මවුපිය වැඩිහිටියන්ගේ අමනාපයට තුඩුදෙන කරුණු මකර ලග්න හිමියන්ට ඇති විය හැකිය. ඥාතීන් හා මිත්‍රයෙන් ඈත්ව යෑමක් පෙන්නුම් කරයි. වැරදි පුරුදු වලට ඇබ්බැහිවීමට ඇති ඉඩකඩ බොහෝය. තත්ත්වයට නොගැළපෙන අය හා ඇසුරට වැටේ. හිතට බියක් දැනෙනු ඇත. පහත් විවිධ අසනීපයන් වැලඳීමේ අවධානමක් ඇති සතියකි. බිරියට හෝ ස්වාමියාට ප්‍රබල අපල තත්ත්වයක් හෝ ඔවුනොවුන්ගෙන් වෙන්වීමක් සිදුවිය හැකිය. තමා සතු වස්තුව ශීඝ්‍රයෙන් අහිමි වී යෑමක් විය හැකි බැවින් බුද්ධිමත්ව කටයුතු කරන්න. විෂ ශරීර ගතවීමක් නිසා අසනීප වූ ඥාතියකු පිළිබඳ අසන්නට සිදුවේ. හෘද ස්පන්දනය වැඩිවීමක්, තිගැස්මක් හෝ අනියත බියක් ඇති විය හැකිය. හෘද රෝගවලින් පීඩා විඳින අය වඩාත් ප්‍රවේශම් විය යුතු කාලයකි. ගෙවතු වගා, ගොවිතැන් වැඩ කරන අයට යහපත උදා වේ. යහපත් පොරොන්දු, ගිවිසුම් ආදිය නිසා හිතට සැනසිල්ලක් ලැබෙනු ඇත.

ශුභ දිනය - සඳුදා

ශුභ වර්ණය - සුදු පාට

ජය අංක - 06, 24

කුම්භ

ධන ලාභද යහපත් මෙහෙකරුවන්ද චිත්ත ප්‍රීතියද දියුණුවද ඇතිවන ශුභ සතියක් කුම්භ ලග්නයෙන් උපන් ඔබට උදා වේ. නිරෝගී බවද අත්විය හැකිය. දේපළ ලාභ, අයිතිවාසිකම් මෙන්ම උසස් අයගේ ආශ්‍රයටද හේතුයි. ඇඟට දැනෙන විශාල ලාභයක් සඳහා ඉඩ පවතී. හොඳ නම රැක ගැනීමත් නම්බුව ආරක්ෂා කරගැනීමත් සිදුවේ. ආදායම ඉහළයයි. යහපත් මිතුරන් ලැබේ. පවුලේ දියුණුව උදා වේ. භූමි ලාභවලටද හේතුයි. විශේෂයෙන් මැණික්, මිණිරන් වැනි ඛනිජ වර්ග ලැබේ. ගොඩනැඟිලි සඳහා අත්තිවාරම් දැමීමක් හෝ එවැන්නකට සහභාගී වීමක් පෙන්නුම් කරයි. සමීප වැඩිහිටියෙකු සතු දේපළක් හදිසියේ ලැබීමට ඉඩ ඇත. මංගල උත්සව සඳහා ආරාධනාවක් හෝ සහභාගීවීමක් පෙන්නුම් කරයි. චිත්‍ර ශිල්පීන්ට තම වටිනා චිත්‍ර ප්‍රදර්ශනයක් පැවැත්වීමට ශුභ සතියකි. පුවත්පත් කලාවේදීන්ට කර්තෘවරුන්ට හා රචකයන්ට ඉතා ශුභ සතියකි. සාරගර්භ රචනාවන් ඉදිරිපත් කිරීමටත් එයින් ජනප්‍රසාදය වැඩිවීමටත් හේතුයි.

ශුභ දිනය - බදාදා

ශුභ වර්ණය - කොළ පාට

ජය අංක – 14, 23

මීන

ධන ලාභ නැති වේ. නිකරුණේ මුදල් වැය වන බවක් මීන ලග්න හිමියන්ට පෙන්නුම් කරයි. සමහරවිට තම ධනය අනුන් විසින් පැහැරගනු ලබයි. ණයට දුන් දේ ආපසු නොලැබීමට හෝ පමාවීමට ඉඩ ඇත. දුරදිග නොබලා කරන කතා නිසා ආරවුල් හෝ අවාසි සිදුවිය හැකිය. සමඟියෙන් සිටි කෙනෙක් විරුද්ධ විය හැකිය. හිතවතුන්ගේ ආශ්‍රය අඩු වේ. නොඑසේ නම් ඈත් වේ. ශරීර සනීපයටද එතරම් ශුභ බවක් නොපෙනේ. තද ලෙස කේන්තියනු ඇත. දත් වල ආබාධ ඇති විය හැකිය. ප්‍රබලු වචන පිටවීමට ඉඩ තිබේ. සමහරවිට තදබල අසනීපයක් වැලඳීමට පුළුවන, විවාහක අයගේ සහකරුටද අශුභ ගෙනදිය හැකිය. ගර්භණී අවධියේ සිටින කාන්තාවන් වඩාත් ප්‍රවේශම් විය යුතු කාලයකි. කරදර සහිතව දින ගෙවී යයි. කෑම වීම සම්බන්ධ අපහසුතා මතුවිය හැකිය. සහෝදරයන්ට සැප ලැබේ. හොඳ ආධාරකරුවන් ලැබීමට නියමයි" අසල්වැසියන්ගෙන් හොඳක් ඇසීමට හෝ ඔවුන්ගේ හොඳ හිත දිනා ගැනීමට හැකි සතියකි. හිතවත් ඥාතියකුට අපලයි.

ශුභ දිනය - ඇගහරුවාදා

ශුභ වර්ණය - රතු පාට

ජය අංක - 03, 12