ඔබේ ලග්නයේ සෙනසුරු කොතැනද?
ජන්ම කේද්‍රයේ කොතැන සිටියත් නිසි කලට වේලාවට සෙනසුරු හෙවත් ශනි හොඳ හෝ නරක ඔබට ගෙනදෙන බව අමතක නොකරන්න.
සෙනසුරු ලග්නයේ හෙවත් පළමු වැන්නේ නම් - මෙම ග්‍රහයා බලවත්ව සිටී නම් දැඩි ආත්ම විශ්වාසයකින් යුතුව තම අභිලාශයන් කෙසේ හෝ ජයග්‍රාහී මාවතකට හරවා ගැනීමට උත්සාහ ගන්නා අයෙකු වේ. මෙම ග්‍රහයා පළමුවැන්නේ දුර්වල වී ඇති නම් කායික හා මානසික වශයෙන් පිරිහීමට ඉඩකඩ වැඩි බවක්‌ මෙහිදී පෙන්නුම් කෙරේ.
සෙනසුරු දෙවැන්නේ නම්- තමාගේ උත්සාහයේ තරමට ප්‍රතිඵල අඩු නමුත් තමාට ලැබෙන ධනයට වඩාවැඩි ධනයක්‌ වියපැහැදම් වනු ඇත. මුහුණ ප්‍රදේශයේ සම දුර්වර්ණ වීම් ලප කැලැල් ඇති වීමටද ඇස්‌ පෙනීමේ අඩු බවක්‌ද පෙන්නුම් කෙරේ.
සෙනසුරු තුන්වැන්නේ නම් - තම සහෝදර සහෝදරියන් නිසා දුකට පත් වීමේ ඉඩකඩ වැඩිය. තමා තුළ කුමන දක්‌ෂතා තිබුණද තම රාජකාරිය හරිහැටි කෙරුවත් අන් අයගේ කීර්ති ප්‍රශංසා ලැබෙන්නේ බොහොම අඩුවෙනි..
සෙනසුරු හතර වැන්නේ නම්- තුලා, මකර, කුම්භ යන රාශියන්04 වැන්න වී එහි සෙනසුරු පිහිටියොත් තමාට පාරම්පරික නිවාස, භූමි ලාභ, හිමිකම් කීමේ ප්‍රවණතාව වැඩි බවක්‌ පෙන්නුම් කෙරේ. මෙම ග්‍රහයා දුර්වල නම් නිතර සිත් තැවුල් කලකිරීම් වලට භාජනය වේ.
සෙනසුරු පස්‌ වැන්නේ නම්- ඉගෙනීමේ කටයුතු වලට යම් යම් බාධාගෙනදෙනමුත් තමාගේ උත්සාහයේ තරමට ප්‍රතිඵල අඩුවේ. තමාට වයසින් වැඩි අය සමග ආදර සම්බන්ධකම් ගොඩනැගී අවසානයේ සිත්තැවුල් හට ගනී.
සෙනසුරු හය වැන්නේ නම්- සෙනසුරු හයේ නම් මෙම ග්‍රහයා මෙම ස්‌ථානයේ බලවත්ව පිහිටියොත් වාසි සහගත තත්ත්වයක්‌ උදාවේ. සතුරු ස්‌ථානයක්‌ වන මෙම ස්‌ථානයේ දුර්වල වී සිටී නම් තමාට රහසිගත සතුරු කුමන්ත්‍රණ ඇතිවන අතර නිතර ලෙඩ රෝග වැළඳීමේ ඉඩකඩද වැඩිවේ.
සෙනසුරු හත් වැන්නේ නම්- සෙනසුරුට දික්‌බල ස්‌ථානයක්‌ වන අතර හවුල් ව්‍යාපාර කටයුතු වලදී යම් යම් අභියෝග යෙදුනද එයට සාර්ථක ලෙස මුහුණ දීමේ හැකියාව ඔහුට හෝ ඇයට ඇතිමුත් ඇතැම් විට තමාගේ විවාහ දිවිය ප්‍රමාද වීමට හෝ විවිධ බාධා ගෙන දීමට ඉඩකඩ වැඩි බවක්‌ පෙන්නුම් කරයි.
සෙනසුරු අටවැන්නේ නම්- මෙම පිහිටීම එතරම් ශුභදායක නොවන අතර කායික හාමානසික වශයෙන් නිතර නිතර පීඩාකාරී තත්ත්වයන්ට විවිධ අවස්‌ථාවන්හි මුහුණ දීමට සිදු වේ. එහෙත් මෙම පිහිටීම ඇතැම් විට දීර්ඝායුෂ ලැබෙන පිහිටීමක්‌ ලෙස සැලකිය හැකිය.
සෙනසුරු නම වැන්නේ නම්- තමාගේ උගත්කමට වඩාඅන් අයට උපදෙස්‌ දෙන ජනසමාජයේ කීර්තිනාමයකට හිමිකම් කියන ආගමික කටයුතු වලදී මුල්තැන ගෙන කටයුතු කරන අයෙකු වේ. එහෙත් මෙම අය ලෞකික සැප සම්පත් එතරම් ඵල ප්‍රයෝජනයට නොගනී.
සෙනසුරු දහ වැන්නේ නම්- දසවැන්නේ සෙනසුරු බලවත් වූ විට කම්කරු ජන සමාජය තුළ නායකත්වයක්‌ ගෙන වැඩකටයුතු කිරීමට සමතෙකු වනු ඇත. යම් විටෙක මෙම ග්‍රහයා දුර්වල වී ඇති නම් වඩාත් පීඩිත ජන සමාජයට වැටෙනු ඇත.
සෙනසුරු එකොළොස්‌වැන්නේ නම්- මෙම අය නීති ගරුක දැඩි මතධාරී තමාගේ උත්සාහයෙන් දියුණුව හාප්‍රසිද්ධිය ලබාගන්නා අයෙකි. ගුප්ත දේවල් සම්බන්ධ දැඩි රුචිකත්වයක්‌ දක්‌වන හුදකලා දිවියට කැමති මෙම අය කෙසේ හෝ සමාජයේ ප්‍රසිද්ධියට පත්වේ.
සෙනසුරු දොළොස්‌වැන්නේ නම්- ආර්ථික වශයෙන් අගහිඟකම් දේපල හානි, නඩුහබ වැනි විවිධ ගැටලු සහිත තත්ත්වයන්ට මුහුණ පෑමට මෙම අයට සිදුවනු ඇත. මෙම අයටද උත්සාහයේ තරමට ප්‍රතිඵල නොලැබෙනු ඇත.
-උපුටා ගැනීම දිවයින-
Advertisements
