මේෂ ලග්නය

නෑ - මිතුරන් ඇසුරට ඉඩ

මිශ්‍රඵල සහිත සතියකි. සතියේ මුල් කාලයේදී මුදල් ලාභ හෝ තමාගේ සිත සතුටට කරුණු සැලැසෙන වෙනත් ලාභයක් ලැබෙනු ඇත. නෑයන් හෝ මිත්‍රයන් සමඟ ආශ්‍රයට ඉඩ ලැබේ. සතුරු කරදර නැති වේ. වෙළෙහෙළෙඳ කටයුතු දියුණුවට පත්වන අතර සමාජ ආශ්‍රය වැඩිවන කාලයකි. අලුතින් ව්‍යාපාර කටයුත්තක් ආරම්භ කිරීමට සිතේ. එය ඔබට අනාගතයේදී බොහෝ සුබපල ලබාදෙනු ඇත. නමුත් මෙම කාලයේදී බාධක ග්‍රහයා වන සෙනසුරු සමඟ කුජ හා බුධ 10 වැන්නේ තවදුරටත් ගමන් කරමින් පැවතීමත් නිසා රැකීරක්ෂා කටයුතුවලට අනවශ්‍ය කරදර මතු වනු ඇත. නමුත් ඔබගේ බලාපොරොත්තු කෙසේ හෝ ඉටුවේ. දණහිස්, තුනට්ය සම්බන්ධයෙන් පවතින අසනීප නම් ක්‍රමයෙන් මෙම සතියේ අඩු වී යයි. 2 හා 8 වැන්න අතර කාලසර්ප දෝෂයක් මෙම කාලයේ පැවතීමත් නිසා විවාහය හෝ ප්‍රේම සම්බන්ධතා පිළිබඳ අවුල් මතු විය හැකි බැවින් ඉතා ඉවසීමෙන් කටයුතු කරගත යුතුයි.

සුබ දිනය - අඟහරුවාදා  |  සුබ වර්ණය - රතු  |  ජය අංකය - 02

වෘෂභ ලග්නය

රැකියා උසස්වීම්

මෙම සතිය ඔබට මිශ්‍රඵල සහිත සතියකි. බොහෝ කටයුතු සාර්ථක කරගැනීමට හැකිවේ. රැකී රක්ෂා තනතුරුවල උසස්වීම් බලාපොරොත්තුවෙන් සිටින අයට එම කටයුතු සාර්ථක වේ. රජයේ හෝ තමන්ගේ කටයුතු කරන තැන ස්වාමියාගෙන් සැලකිලි ගෞරව ලැබේ. සිතේ සමාදානය සතුට ඇතිවේ. අධ්‍යාපන කටයුතු සාර්ථක වේ. රාහු ලග්නයේම ගමන් කරමින් පවතින බැවින් මෙම කාලයේ ඔබ ආරම්භ කරන වැඩ කටයුතු වලට වැඩිහිටියන්ගෙන් උපදෙස් ලබාගත යුතුයි. තවද බාධක ග්‍රහයා වන සෙනසුරු 9 වැන්නේ ගමන් කිරීම නිසා ඔබ පුණ්‍ය කටයුතුවලට නිතර සහභාගි විය යුතුය. තමා උනන්දුවෙන් එම කටයුතු කරගත යුතු වේ. ජන්ම ඒරාෂ්ටකයක් ගතකරන අයට නම් මෙම දිනවල ගෙදර වාසය කරදර සහිත විය හැකි බැවින් ඉවසීමෙන් කටයුතු කරගත යුතුයි. නමුත් තදබල අපල ඇති නොකරයි.

සුබ දිනය - බදාදා  |  සුබ වර්ණය - ළා දම්  |  ජය අංකය - 02

මිථුන ලග්නය

විනෝද ගමන්

සහෝදරයන්ගේ, දූ-දරුවන්ගේ ඉගෙනීමේ කටයුතු සාර්ථක වේ. ප්‍රීතිමත් විනෝදදායක ගමන් යෑමට ඉඩ ලැබෙන සතියකි. පවුලේ අයගෙන් සැනසීමට කරුණු ඇති වන අතර දූ-දරුවන් සිටින කෙනෙක් නම් ඔවුන්ගේ කටයුතු වලට ඇවිදීමට සිදු වේ. පවුල් ජීවිතය සාර්ථකව පවත්වාගෙන යෑමට හැකිය. අෂ්ටම ඒරාෂ්ටක අපල කාලයේ අවසාන කාලය ගෙවෙමින් පවතින බැවින් ඔබ මෙම කෙටි කාලයේද ඉතාමත් බුද්ධිමත්ව කටයුතු කළ යුතු වේ. සුළු කරදර කිහිපයකට මුහුණදීමට සිදුවේ. ගුප්ත විද්‍යාවලින් හෝ අමනුෂ්‍ය ප්‍රේත දෝෂයක් නිසා පැවැති කරදරයක් ක්‍රමයෙන් අවසන් වී යයි. සතියේ අවසාන කාලයේ දුර ගමන් බිමන්වලින් කරදර විඳීමට සිදුවිය හැකිය. තමාට පිහිටට සිටි කෙනෙකුට විපත්තිදායක කාලයකි. මංගල යෝජනා වෙනස් වන්නට හැකිය.

සුඛ දිනය - බදාදා |  සුඛ වර්ණය - නිල්  |  ජය අංකය - 09

කටක ලග්නය

විවාහ බලාපොරොත්තු ඉටුවෙයි

සුබපල සහිත සතියකි. ගෙදරදොර ඉඩකඩම් දියුණුවට පත්වන කාලයකි. දේපොළ මාර්ගයෙන් මෙම කාලයේ මිල මුදල් ලාභ ලැබේ. ගෙදරදොර සැප පහසුවද දැනට කරගෙන යන කටයුතුද දියුණුවට පත්වේ. දරුවකු බලාපොරොත්තු වන අයට මෙම කාලයේ දරුලාභ ලැබේ. විවාහයට සුබ කාලයකි. විවාහය සම්බන්ධයෙන් පැවැති බලාපොරොත්තු ඉෂ්ට වනු ඇත. ආගමික කටයුතුවල යෙදී සිටින අය තමාට විරුද්ධ විය හැකිය. එසේම පිට පළාත්වල අයගෙන්ද ආගන්තුකයන්ගෙන්ද සතුරු පීඩා ඇති වීමට ඉඩ පවතින බැවින් ඒ සම්බන්ධව සැලකිලිමත් විය යුතු වේ. ඔබ සුවන දෙනට යන නැකැත්වලින් ඉපදී ඇත්නම් ඉතාම ප්‍රවේශම් විය යුතු වේ.

සුබ දිනය - සඳුදා  |  සුඛ වර්ණය - ළා  |  කොළ ජය අංකය - 05

සිංහ ලග්නය

නිතරම සුළු ගමන් ඇතිවේ. පවුලේ අයගේ ආශ්‍රය වැඩිපුර ඇතිවන අතර අසල්වැසියන්ගේ කටයුතුවලට උදවු කිරීමට සිදුවේ. තම බලය පෙන්වීමට සිතන කාලයකි. ඒ සඳහා අවස්ථාව උදාවේ. සහෝදරයන් ළඟට යෑමට සිදුවේ. රාහු 10 වැන්නේ ගෝචරව ගමන් කිරීම නිසා රැකියාවේ යම් යම් කරදර මතු වීමට හැකිය. බොහෝ ඉවසීමෙන් තම රාජකාරි කටයුතු මෙම කාලයේ කරගත යුතු වේ. ගෙදරදොර කටයුතු ගැන මහන්සිවීමට සිදුවන අතර සහෝදර සහෝදරියන් තම නිවෙසට පැමිණීමට හැකිය. උදරාබාධ හෝ තුනටිය ආශ්‍රිත අසනීප මතු වේ. නමුත් එම රෝග තත්ත්ව සතිය අවසානයේදී සුව අතට හැරෙනු ඇත. පවුල් ජීවිතය සාර්ථකව ගෙනයෑමට හැකිවේ. වැඩිහිටි මවුපියන්ට සුබපල සහිත සතියකි. දරුවන්ගේ අධ්‍යාපන කටයුතු සාර්ථක වේ. දරුවන්ගේ රැකීරක්ෂා කටයුතු දියුණු වේ. ආ

සුබ දිනය - බදාදා  |  සුඛ වර්ණය - දම්  |  ජය අංකය -04

කන්‍යා ලග්නය

රහස් සතුරු කරදර

සතියේ මුල් කාලයේ ධන හානි ඇතිවේ. තම මිල මුදල් බඩුබාහිරාදිය පරිස්සම් කරගත යුතුයි. රහස් සතුරු කරදර නිසා තම සිත තරමක් නොසන්සුන්වන කාලයකි. සතියේ මුල් දින කිහිපයේදී කරදර මතු විය හැකි බැවින් කල්පනාකාරීව කටයුතු කරන්න. අවසාන කාලයේදී සුපල ලැබෙනු ඇත. මෙතෙක් නැවතී තිබූ තමාගේ කටයුතු නැවත ආරම්භ කිරීමට ඉඩ ලැබේ. නිර්භය අයුරින් කටයුතු කිරීමට සහ තම බලය පෙන්වීමටත් එඩිතරව කටයුතු කිරීමටත් සිතෙන කාලයකි. අධ්‍යාපන කටයුතු හොඳින් කරගෙන යෑමට හැකිවන අතර එම කටයුතු සාර්ථක වේ. සුවන හෝ දෙනට යන නැකැත්වලින් ඉපදී ඇත්නම් බොහෝ කටයුතුවලට බාධක ඇතිවේ.

සුබ දිනය - සිකුරදා  |  සුබ වර්ණය - ළා නිල්  |  ජය අංකය - 09

තුලා ලග්නය

උසස් අයගෙන් උදවු

මිල මුදල් ලාභ ලැබේ. සාමාන්‍යයෙන් ප්‍රීතිමත් වාසනාවන්ත කාලයකි. උසස් අයගෙන් උදවු උපකාර ලැබෙන කාලයකි. රැකියාව සම්බන්ධව මෙතෙක් තිබූ කරදර බාධක මෙම කාලයේදී අවසන් වේ. සිතට නිදහසක් දැනේ. සතුටින් සිනාමුසුව සිටීමට හැකි කාලයකි. තමාගේ සිතට අහංකාර ගති ඇති වන අතර තමා පිළිබඳව මාන්නයෙන් කටයුතු කරයි. අධ්‍යාපන කටයුතු හා ව්‍යාපාර කටයුතු සාර්ථකව කරගෙන යෑමට හැකිවේ. මෙම කාලයේදී උණ ගතියක් හෝ හිසේ කැක්කුමක් හෝ හිසට තුවාල ඇති විය හැකිය. ගිනි බය ඇති කරවන කාලයකි. දෙනට නැකැතින් ඉපදී ඇති නම් බොරු චෝදනාවලට හසුවිය හැකි බැවින් බුද්ධිමත්ව කටයුතු කරන්න. පියාට තරමක් අපල කාලයකි. සිතට බයක් ඇතිවේ. තදබල අපල කාලයක් නොවේ.

සුබ දිනය - බ්‍රහස්පතින්දා |  සුබ වර්ණය - විසිතුරු ජය  |  අංකය - 04

වෘශ්චික ලග්නය

ගේ දොර ඉඩකඩම් ලාභ

තිබුණු ගෞරවය, සැලකිලි තරමක් අඩු වන කාලයකි. නිෂ්ඵල වියදම් වැඩිවේ. වෙළෙහෙළෙඳ ව්‍යාපාර කටයුතු ඉතාමත් කල්පනාවෙන් කර ගත යුතු කාලයකි. රව් ග්‍රහයා 4 වැන්නේ ගුරු සමඟ ගමන් කිරීම නම් ඔබට සුබපල ලබාදීමට හේතුවේ. ඉඩකඩම් ගෙවල්දොරවල් සම්බන්ධයෙන් ලාභ ලැබේ. දෙනට නැකැතින් ඉපදී ඇති අයට නම් ශරීර වේදනා හා හිත් රිදවීම් ඇති වීමට ඉඩ තිබේ. එම අයට රැකීරක්ෂා කටයුතුවල අනවශ්‍ය කරදර මතුවන බැවින් ඉවසීමෙන් කටයුතු කරන්න. රජයේ වැඩකරන අය හට විශේෂයෙන්ම අපලදායක වේ. දරුවන්ව ආරක්ෂා කරගත යුතු අතර දරුවන්ට උස් ස්ථානවල නැඟීමට මෙම කාලයේ ඉඩ නොදිය යුතුය. පොදුවේ සියලු දෙනාට සතිය අවසානයේ අධ්‍යාපන කටයුතු හොඳින් කරගෙන යෑමට හැකිවෙන අතර ඉගෙනීමේ ආශාව වැඩි වේ. අලුත් හිත මිතුරන් ලැබෙයි. මිතුරන් සමඟ ළඟින් ඇසුරු කිරීමට ඉඩ ලැබේ. තම වාසියට කතා කිරීමට ඉඩ ලැබේ.

සුබ දිනය - අඟහරුවාදා  |  සුබ වර්ණය - රතු  |  ජය අංකය - 09

ධනු ලග්නය

අමනාප වූ මිතුරන් සොයා එයි

ගෞරව සැලකිලි වැඩිවන සතියකි. ඉඩකඩම් දේපොළ වාසි ලැබේ. අධ්‍යාපන කටයුතු සාර්ථක වේ. මුදල් සම්බන්ධ කරදර අඩු වී යයි. අලුත් හිත මිතුරන් ඇතිවන අතර පසුගිය කාලයේ අමනාප වූ මිතුරන් නැවත තමාව සොයා එනු ඇත. මෙම ධනු කාලයේදී තමාට පසුගිය කාලයේ නැති වූ තත්ත්වය, බලය හා ධනය නැවත ලැබේ. අලුතින් නිවෙසක් සෑදීමට හෝ තමා අතහැර දමා තිබූ නිවාස දේපොළ අලුත්වැඩියා කිරීමට සිතෙන කාලයකි. උස් අයගෙන් උදවු සැලකිලි ලැබෙයි. ව්‍යාපාර දියුණුවට පත්වන කාලයකි. උපතේදී සඳු 2 හෝ 3 යන රාශිවල හෝ දුර්වල ග්‍රහයකුගේ දශා කාලයක් ගත කරයි නම් ඔබට සුබපල අඩු වී අනවශ්‍ය කරදර ඇති වේ. ඉඳුම් හිටුම් මුදල් සම්බන්ධ ගැටලුවලට මුහුණ දීමට සිදුවේ.

සුබ දිනය - බ්‍රහස්පතින්දා  |  සුබ වර්ණය - කහ  |  ජය අංකය - 06

මකර ලග්නය

ආදායම් තත්ත්වය ඉහළට

වැඩි දියුණුවට කටයුතු සැලසෙන ආදායම් තත්ත්වය ඉහළ යන කාලයකි. ආදායම් මාර්ග වැඩිවේ. නොසිතූ ලෙස හදිසි ධන ලාභ ලැබෙන සතියකි. සිතට සැනසීමක් දියුණුවක් ගෙනදෙන කාලයක් වන අතර ආගමික පොතපත් කියවීමට ලැබේ. තමාගේ නම ප්‍රසිද්ධ වීමට ලක්වේ. තමා ඉගෙන ගත් දෙය ඉන් රටට ප්‍රසිද්ධ වේ. ගරු සැලකිලි ලැබෙන කාලයකි. තමාට හෝ පවුලේ අයකුට දරු ලාභයක් ලැබෙනු ඇත. ඉඩකඩම් දේපළ මාර්ගයෙන් ලාභ ලැබේ. ස්ත්‍රීන් අතර ප්‍රසිද්ධියට පත් වේ. වෙළෙහෙළෙඳ ව්‍යාපාර හොඳින් පවත්වාගෙන යෑමට ඉඩ ලැබේ. මෙම කාලය ජීවිතයේ වාසනාවන්ත කාලයකි. උපතේදී සඳු ග්‍රහයා 2 වැන්නේ තැම්පත් නම් සුබපල අඩු වී යයි. අනවශ්‍ය කරදර හෝ නීතිමය ගැටලුවලට මුහුණ දීමට සිදුවේ. එමෙන්ම උපතේදී සඳු 7 වැන්නේ නම් පවුල් ජීවිතේ හෝ ප්‍රේම සම්බන්ධතා පිළිබඳවද කරදර මතු විය හැකිය.

සුබ දිනය - සිකුරාදා  |  සුබ වර්ණය - නිල්  |  ජය අංකය - 05

කුම්භ ලග්නය

නැති වූ දේ නැවත ලැබේ

තමාගේ ඉඩකඩම් දියුණු කර ගැනීමට ගන්නා උත්සාහයන්ගේ ප්‍රතිඵල ලැබේ. වැඩ කටයුතුවලට බැසීමට සිදු වේ. උත්සාහයෙන් රැකීරක්ෂා කරගෙන ගියහොත් තරමක සැනසීමක් ලබාගත හැකිය. නින්දාවක් විඳීමට ඉඩ තිබෙන බැවින් කල්පනාකාරීව ක්‍රියා කළ යුතු වේ. බොහෝ උත්සාහයන්ගේ ප්‍රතිඵල අඩු කාලයකි. පසුගිය කාලයේ නැති වූ දේවල් නැවත ලැබෙනු ඇත. එම නිසා සිතේ සතුට ඇති වේ. අනවශ්‍ය වියදම් වැඩි කාලයකි. මෙම ගත කරන කාලය ඉතා ඉවසීමෙන් හා බුද්ධිමත්ව අවසන් කර ගත යුතුයි. ව්‍යාපාර කටයුතුවලින් සාර්ථක වීමට නොහැකි වීම නිසා කනගාටුවෙන් කාලය ගෙවීමට සිදු වේ. සුබ ග්‍රහයකුගේ දසා කාලයක් ගත කරයි නම් සුඛ පල ලැබේ. එම අයට නම් කරන කියන කටයුතු සාර්ථක වේ. බෝධි පූජාවක් හැකි සෑම විටම තබන්න.

සුබ දිනය - බදාදා  |  සුබ වර්ණය- නිල්  |  ඡය අංකය - 03

මීන ලග්නය

යහපත් පෙම් සබඳතා

ශරීර සනීපය ඇති කරන කාලයකි. සම්පූර්ණ ගෙහිමියෙක් වශයෙන් අයිතිවාසිකම් ද ඇතිව තම බලය පැවැත්වීමට ඉඩ ලැබේ. සිතට සැනසීම ගෙනදෙන කාලයකි. පවුලේ දියුණුවට කටයුතු සැලසේ. හොඳ වැදගත් ප්‍රේම සබඳතා ඇතිවේ. එම සබඳතා විවාහය දක්වාම පවතී. අලුතින් රැකීරක්ෂා ලැබේ. නිතරම තම ආශ්‍රයට හිතවත් පිරිසක් ලැබේ. මෙම කාලයේ තමාගේ ළඟම වැඩිහිටියකුට අපල කාලයක්ද වන අතර ඔවුන් අසනීප වීමට ඉඩ ඇත. තමාගේ පාද ආශ්‍රිතව පවතින අසනීප සුව අතට හැරේ. මුත්‍රාශය හෝ ඒ ආශ්‍රිත අසනීප මතුවීමට ඉඩ තිබේ. විදෙස් ගතවීමට බලාපොරොත්තු වන අයට එම බලාපොරොත්තු ඉටු වේ. සුවන නැකැතින් ඉපදී ඇති නම් කරදර මතු වීමට හැකිය. ඉදිරියේදී ලග්න ඒරාෂ්ටක අපල කාලයක් ආරම්භ වන බැවින් මෙම කාලයේදී සිහි බුද්ධියෙන් කටයුතු කර ගත යුතුවේ.

සුබ දිනය - බ්‍රහස්පතින්දා  |  සුබ වර්ණය - කහ  |  ජය අංකය - 09