“පහත සඳහන් පලාපල තත්ත්වයන් ඔබේ ජන්ම පත්‍රයේ ග්‍රහ පිහිටීම මත දැනට ගතවන මහ දශා, අතුරු දශා, ග්‍රහයන් උප්පත්තියේදී පිහිටි නැකැත්, 22 දෙර්කාණාධිපති, 64 නවාංශකාධිපතිගේ තත්ත්වයන් හා වෙනත් ග්‍රහ දෘෂ්ටිය මත යම් පමණක අඩු වැඩි වන බව සලකන්න.”

මේෂ ලග්නය

යහපත් අය මිතුරු වෙයි

මෙම සතිය සුබපල සහිත සතියකි. සාමාන්‍යයෙන් දියුණුවට අවශ්‍ය කටයුතු කිහිපයක්ම අවසන් කර ගැනීමට හැකි වේ. යහපත් අය සමඟ මිත්‍රකම් ඇති කර ගැනීමට හෝ ආශ්‍රය කිරීමට අවස්ථාවන් ලැබේ. සතුරන්ගෙන් කරදර ඇති නොවේ. පිට පළාත්වල වැඩ කරන කෙනකුට නම් බලාපොරොත්තුවෙන් සිටි ස්ථාන මරුවීමක් ලැබීමට ඉඩ ඇත. ගොවිතැන් කරන අයට හා වෙළහෙළෙඳ ව්‍යාපාර කරන අයගේ ආදායම් වැඩි කර ගැනීමට හැකිවේ. මෙම කාලයේ අනවශ්‍ය දේවලට මුදල් වියදම් නොකළ යුතුය. රැකියාවේ පැවැති කරදර, සිත් අමනාප වීම් අවසන් කර ගැනීමට හැකි සතියකි. සුබ මංගල යෝජනා ලැබෙනු ඇත. විවාහය සම්බන්ධ බලාපොරොත්තු ඉටු කර ගැනීමට හැකිවේ. අධ්‍යාපන කටයුතු සාර්ථක වේ. බලාපොරොත්තු කිහිපයක්ම ඉටු කර ගැනීමට හැකිවේ. ඔබට උපන් කේන්දරය අනුව අසුබ දශාවක් හෝ ජන්ම ඒරාෂ්ටක අපල කාලයක්ද නොමැති නම් මෙම කාලය ඉතා සුබ කාලයකි.

සුබ දිනය - අඟහරුවාදා

සුඛ වර්ණය - රතු

ජය අංකය - 09

වෘෂභ ලග්නය

භූමි දේපළ ආදායම්

සතියේ ආරම්භක දින කිහිපය ප්‍රවේශම් විය. යුතුය. සිතට කිසිම ප්‍රීතියක්, විනෝදයක් නැතිවේ. බලාපොරොත්තු ඉෂ්ට නොවේ. ආදර බැඳීම්වලින් සිත් තැවුල් ඇතිවේ. ශරීර අසනීප ගති සෑදීමට වුවද හැකිය. ලග්නාධිපති සිකුරු 8 වැන්නේ පාප ග්‍රහයකු සමඟ ගමන් කරමින් පැවැතීම සුබපල නොලැබීමට හේතු වේ. නමුත් ඔබ පින්දහම් කටයුතුවලට යොමුවන්නේ නම් බොහෝ අසුබ ශක්තීන් අවම වනු ඇත. සතියේ අවසාන කාලය යහපත් වේ. රැකීරක්ෂා කටයුතු දියුණුවට පත් වේ. බලාපොරොත්තුවෙන් සිටි දෙයකින් ජය ලැබේ. ගෙදර දොර වාසනාවන්ත වේ. හොඳ ආහාරපාන වර්ග ලැබේ. ශරීර සනීපය යහපත් වීමත් අධ්‍යාපන කටයුතු සාර්ථක වීමද සිදුවේ. භූමිය දේපළ මාර්ගයෙන් ආදායම් ලබා ගැනීමට මර්ගයක් විවෘත වන සතියකි. කුලී නිවාස සම්බන්ධයෙන් පවතින ගැටලු තවදුරටත් පවතිනු ඇත.

සුබ දිනය - සිකුරාදා

සුබ වර්ණය - විසිතුරු

ජය අංකය - 06

මිථුන ලග්නය

හිතවතකුගෙන් ආදර සංග්‍රහ

සතියේ මුල් දින කිහිපය ප්‍රවේසම් විය යුතුය. කරදර සිත් තැවුල් හා තරමක සිතට දුකක් දැනෙන දවස් වේ. සිතට බයක් හෝ සැකයක් මතු වීමටද ඉඩ තිබේ. මිල මුදල් හානිය හෝ අධික වියදම් සහිත දින කිහිපයකි. සතියේ අවසාන කාලය මුල් දිනවට වඩා යහපත් වේ. බලාපොරොත්තු ඉෂ්ට වේ. හිතවතකුගේ ආදර සංග්‍රහයක් ලැබේ. සමහර විට තෑග්ගක් විය හැකිය. දේපළ දියුණු වේ. අනුන්ගෙන් සුළු සුළු ලාභ ලැබීමද සිදු විය හැකිය. අපල කාලයක්ද ගෙවමින් පවතින නිසා පුණ්‍ය කටයුතුවල නිරත වෙමින් සුබ කටයුතු කර ගැනීම බෝහෝ බාධාවන් අඩු වීමට හේතුවේ. ලග්නාධිපති බුධ, සෙනසුරු සමඟ 8 වැන්නේ ගමන් කරමින් පවතින මෙම කාලය මඟහැර තමාගේ සුබ කටයුතු ආරම්භ කිරීම ඔබට යහපත උදා වීමට හේතු වේ. නැතිනම් මුදල් හානි, රැවටීම් ආදියට මුහුණ දීමට හැකිය.

සුබ දිනය - බදාදා

සුඛ වර්ණය - ළා කොළ

ජය අංකය - 05

කටක ලග්නය

සුහදතාව ගොඩනැඟේ

මිශ්‍රපල සහිත සතියකි. උසස් අය සමඟ ආශ්‍රය ඇතිවේ. ගේදොර, ඉඩකඩම් හෝ දරුවන් වෙනුවෙන් ආයෝජනය කිරීමට අදහස් ඇතිවන සතියකි. තම සිතැඟි පරිදි කටයුතු කිරීමට ඉඩ ලැබෙනු ඇත. අන්‍යයන් හා වඩාත් සුහදතාව ගොඩනැගෙන කාලයකි. නමුත් හවුල් ව්‍යාපාර කටයුතුවලදී නම් වඩාත් ප්‍රවේශම් විය යුතුය. අධ්‍යාපන කටයුතු හොඳින් කරගෙන යෑමට හැකිවේ. අධ්‍යාපන කටයුතු නිතර නිතර වෙනස් කිරීමට නොයා යුතුය. ව්‍යාපාරිකයන්ට තරමක් ගැටලු ඇති කරන සතියකි. සුබ ග්‍රහයන් සියලු දෙනා අසුබපල සහිත ස්ථානවල ගෝචරව ගමන් කරමින් සිටින බැවින් නිතර නිතර සිත් රිදවීම්, රැවටීම්, මුදල් හානි වීම්ද සිදු වීමට හැකිය. විවාහයට හෝ කලත්‍රයාටත් තරමක් අපල කාලයක් බැවින් පින්දහම් කටයුතු හා අවශ්‍ය පිළිවෙත් කර ගැනීම ඔබට යහපත උදාවීමට හේතුවේ.

සුඛ දිනය - බ්‍රහස්පතින්දා

සුබ වර්ණය - රන්වන්

ජය අංකය - 03

සිංහ ලග්නය

දියුණුවට කටයුතු සැලසෙයි

දියුණුවට කටයුතු සැලසෙන සුබ සතියකි. ණය තුරුස්වලින් නිදහස හෝ ණය ගනුදෙනුවලින් ලාභ ලැබෙනු ඇත. ආදායම වැඩිවේ. වෙළහෙළඳ ව්‍යාපාරවලින්ද ලාභ ලැබෙන කාලයකි. සාමාන්‍යයෙන් තමා බලාපොරොත්තු වන කටයුතු ආරම්භ කිරීමට හෝ කරගෙන යන කටයුතු සාර්ථකව අවසන් කර ගැනීමටද ඉඩකඩ ලැබෙන සුබ සතියකි. ඔබ සෙනසුරුගේ දශාවක් ගත කරමින් පවතී නම් විවාහය හෝ ප්‍රේම සම්බන්ධතාවන් පිළිබඳ පැටලැවිලි ඇතිකරන කාලයක් බැවින් ඉවසීමෙන් කටයුතු කර ගත යුතුය. පවුල් ජීවිතය සාර්ථකව ගත කිරීමට හැකිවේ. අධ්‍යාපන කටයුතු හා ව්‍යාපාර කටයුතුද සාර්ථක වේ. දෙනට, සියාවස වැනි නැකැත්වලින් ඉපදී ඇතිනම් එම අයට තරමක බාධක හා අසනීපවලට මුහුණදීමට සිදුවන බැවින් ප්‍රවේශම් විය යුතුය.

සුබ දිනය - අඟහරුවාදා

සුබ වර්ණය - රතු

ජය අංකය - 09

කන්‍යා ලග්නය

විදෙස් ගතවීමේ බලාපොරොත්තු ඉටුවෙයි

සිතේ සතුට හා සැනසීම ඇතිවේ. තමාගේ වැඩකටයුතු සාර්ථක වේ. අලුතින් ආරම්භ කරන කටයුතු මෙන්ම කරගෙන යන කටයුතුද දියුණුවට පත් වේ. විදෙස් ගත වීමට බලාපොරොත්තුවෙන් සිටින අයගේ එම බලාපොරොත්තු සාර්ථක වේ. රැකියාවේ උසස් වීම් ලබා ගැනීමේ තරග විභාග ආදියෙන් ජය ලැබේ. නිවාස, දේපළ ආදිය කුලියට දීමට හැකිවේ. කුජ සිකුරු 4 වැන්නේ ගමන් කරමින් පැවැතීම දේපළ ඉඩකඩම් දියුණුවට හේතුවේ. නමුත් පවුල් ජීවිතයේ සුළු සුළු ගැටුම් ඇති වීමටද හැකි බැවින් ඉවසීමෙන් කටයුතු කළ යුතුය. ශරීර සනීපය ඇතිවේ. වාසනාවන්ත ප්‍රීති උත්සවවලට සහභාගි වීමට ඉඩ ලැබේ. රජයෙන් හෝ තමා කටයුතු කරන තැන ස්වාමියාගෙන් සැලකිලි ගෞරව ලැබෙනු ඇත. දරුවන්ට, මවුපියන්ට සුබ සතියකි.

සුබ දිනය - බදාදා

සුබ වර්ණය - ළා කොළ

ජය අංකය- 05

තුලා ලග්නය

නඩු හබවලින් ජය

මෙම සතිය ඔබට සුබපල සහිත සතියකි. හදිසි ලැබීමක් නිසා සිතේ සතුට ඇතිවේ. මවු පාර්ශ්වයෙන් විශේෂ උදවු උපකාර ලැබීම නිසා තමාගේ බොහෝ සුබ කටයුතු සාර්ථක කර ගැනීමට හැකිවේ. නව ආදායම් මාර්ගයක් පිළිබඳ අදහසක් මතු විය හැකි සතියකි. යම් ව්‍යාපාරයක් ආරම්භ කිරීමට බලාපොරොත්තුවෙන් සිටින අයට එම කටයුතු සඳහා අවශ්‍ය කටයුතු පහසුවෙන් කර ගැනීමට හැකිවේ. නිවෙසට හෝ ඉඩමක් සම්බන්ධයෙන් පැවැති කරදරයකින් නිදහස් වීමට හැකිවේ. නඩුහබවලින් ජය ලැබේ. අධ්‍යාපන කටයුතු සාර්ථක වේ. කලාව සම්බන්ධයෙන් කටයුතු කරන අයට සුබපල ලැබේ. වාසනාවන්ත දරු ලාභ ලැබෙන කාලයකි. දරුවන්ගේ අධ්‍යාපන කටයුතු සාර්ථක වේ. පතල් ආදී පොළොවෙන් ලාභ ලබන අයට යහපත් ප්‍රතිඵල ගෙන දෙනු ඇත.

සුබ දිනය - සිකුරාදා

සුඛ වර්ණය - විසිතුරු

ජය අංකය – 06

වෘශ්චික ලග්නය

අමනාපව සිටි අයකු මිතුරු වෙයි

සුබපල සහිත සතියකි. මෙම සතිය තුළ ඉටු වීමට අවස්ථාව යෙදේ. පසුගිය දිනවලට වඩා උනන්දුවෙන්, උත්සාහයෙන් සිය වැඩ කටයුතු කරගෙන යයි. අතේ මිටේ නිතර මුදල් ගැවසේ. මුදල් අතින් වාසනාවන්ත සතියකි. ණය තුරුස්වලින් නිදහස් වීමට ලැබේ. ආදරය හා විවාහය සම්බන්ධ කටයුතු හොඳින් පවත්වාගෙන යෑමට හැකි වේ. කලක් අමනාපයෙන් සිටි කෙනෙකු මිතුරු වේ. මවුපිය වැඩිහිටියන්ටද සුඛවේ. ශරීර සනීපය සහිත සතියකි. අත්‍යවශ්‍ය කෙටි ගමන් බිමන් නිතර යෙදෙන කාලයකි. සතියේ අවසාන දින කිහිපය තරමක් ඉවසීමෙන් කටයුතු කිරීම ඔබට සමහර කරදරවලින් නිදහස් වීමට උදව් වේ. නැති නම් රැකියා ස්ථානයේදී දෝෂාරෝපණයකට ලක්විය හැකිය. කෙසේ නමුත් සාමාන්‍යයෙන් මෙම සතිය සිතේ නිදහස සහිත සුබ සතියකි.

සුබ දිනය - අඟහරුවාදා

සුඛ වර්ණය - රතු

ජය අංකය - 09

ධනු ලග්නය

ව්‍යාපාර දියුණුව ඇතිවෙයි

සුබපල සහිත සතියකි. බලාපොරොත්තු ඉෂ්ට වේ. ශරීර සනීපය යහපත් වේ. කලක සිට පැවැති අසනීප වලින් ක්‍රමයෙන් සුවය ලැබේ. හොඳ ආහාරපාන වර්ග ලැබෙන වාසනාවන්ත සතියකි. ආදර සංග්‍රහ කරන්නෙක් ළඟට යෑමට සිදුවේ. ගෙදර දොර කටයුතුවලින් සැනසිලි ලැබෙනවා ඇත. වතුර, දියර වර්ගවලින් සිදුකරන ව්‍යාපාර දියුණුව ඇතිවේ. සතිය මැදදි අධ්‍යාපන කටයුතු සඳහා වෙහෙසීමට සිදු වේ. වෘත්තීය ඉගෙනීමකට සම්බන්ධ වීමට සිදු වේ. පෙර වසර කිහිපයක සිටම පැවැති ගැටලුවක් සමථයකට පත්වේ. තමාගේ පැවැති කරදර ක්‍රමයෙන් විසඳී යන සතියකි. දෙනට, සියාවස වැනි නැකැත්වලින් ඉපදී ඇති නම් ප්‍රවේශම් විය යුතුය.

සුබ දිනය - බ්‍රහස්පතින්දා

සුබ වර්ණය - තඹ

ජය අංකය - 01

මකර ලග්නය

ගරු සැලකිලි ලැබෙයි

වාසනාවන්ත සතියකි. ගෞරවද, සැලකිලිද, නම්බුවද වැඩි වැඩියෙන් ලැබෙන කාලය මෙයයි. අලුත් උසස් තත්ත්වයකට පැමිණේ. වෙළහෙළඳ කටයුතු කරන අයගේ වැඩිදියුණුව ඇති වේ. රජයේ රැකියාවල නියුක්ත අයට මෙන්ම අනිකුත් රැකියවල නියුක්ත අයටද වැඩිපුර ගරු සැලකිලිද නම්බුවද, තනතුරුවලින් උසස් වීමද ලැබෙනු ඇත. ටික ටික ලැබෙන මුදල් එක වර ලැබෙන්නට ඉඩ තිබේ. අලුතින් ව්‍යාපාර ආරම්භ කරන අයට වඩා සුබ කාලයකි. ශරීර සනීපය යහපත් වේ. ගෙදර දොර සැප පහසුව වාසනාව මතුවන අතර දියුණුවට මග විවර වේ. විශේෂයෙන්ම හිත මිත්‍රයන්ගෙන් ආධාර උපකාර ලැබෙනු ඇත. යෝගකාරක ග්‍රහයකුගේ දශාවක්ද මෙම කාලයේ ගත කරමින් පවතින අයට ඉතාමත් වාසනාවන්ත කාලයකි. උපතේදී සඳු 2 වැන්නේ තැන්පත් නම් සුබපල අඩු වී අනවශ්‍ය කරදර, සිත් පීඩා, මුදල් ගැටලු, නීතිමය ගැටලු ඇති කරයි.

සුබ දිනය - බදාදා

සුබ වර්ණය - නිල්

ජය අංකය - 05

කුම්භ ලග්නය

ණය තුරුස්වලින් නිදහස

මිශ්‍රපල සහිත සතියකි. ඒරාෂ්ටක අපල කාලයක් ගෙවමින් පැවතුණද ඔබගේ නොපසුබට උත්සාහය නිසා තම කටයුතු සාර්ථක කර ගත හැකි වේ. අධ්‍යාපන කටයුතු සාර්ථක වනු ඇත. පෙර තිබූණය තුරුස්වලින් නිදහස් වේ. නමුත් ණය කරදර නිතර ඇති වීමට ද හැකිය. නව රැකියා සඳහා අවස්ථාව ලැබෙන අතර දැනට කරන රැකියාවේ උසස් වීම් ලැබීමට අවස්ථාව උදාවේ. මෙම කාලයේ පින්දහම් කටයුතු වලට සහභාගි වීම වඩාත් සුබ වේ. නස වෙහෙසවා කරන රැකියා හෝ මාධ්‍ය කටයුතුවල රැකියාවේ නියුතු අයට වාසනාවන්ත නම්බුනාම ලැබෙන කාලයකි. ඔබ සුවණ, දෙනට යන නැකැත්වලින්ද ඉපදී ඇතිනම් වඩාත් කරදර ඇතිවීමට හැකි කාලයකි. පාදවල ආබාධ, පදිංචිය පිළිබඳ කරදර, නීතිමය ගැටලු හෝ තම දේපළ පිළිබඳ කරදර ඇතිවීමට ඉඩ ඇති අතර ඒ සම්බන්ධයෙන් සැලකිලිමත් වන්න. අනවශ්‍ය වියදම් පාලන කර ගත යුතු වේ. අලුතින් ව්‍යාපාර හෝ වැඩිහිටියකුගේ උපදෙස් නොමැතිව අලුතින් මුදල් ආයෝජනය නොකළ යුතුය.

සුබ දිනය - බදාදා

සුඛ වර්ණය - නිල්

ජය අංකය - 05

මීන ලග්නය

තරග විභාගවලින් ජය

තමාට වඩා තත්ත්වයෙන් පහත් අයගෙන්ද, මහන්සියෙන් කරන කටයුතුවලින්ද මෙම කාලයේ ලාභ ලැබෙනු ඇත. ශරීර සනීපය සඳහා වියදම් කිරීමට සිදුවේ. වගකීම් සහිත උසස් තනතුරුවලට පත්වේ. මංගල යෝග ගැන කතා කිරීමට සිදුවේ. දේපළ පිළිබඳ කරදර තිබේ නම් ඒවායින් සැනසීම හා ජය ලැබේ. අධ්‍යාපන කටයුතු සඳහා සුබ කාලයකි. තරග විභාගවලින් ජය ලැබේ. උසස් අධ්‍යාපන කටයුතු සඳහා විදේශීය රටවල ශිෂ්‍යත්ව පවා ලැබීමට හැකිය. අසුබ දසාවක් හෝ උපතේදී සදු ග්‍රහයා 12 වැන්නේ තැන්පත් අයට නම් කනගාටු සිත්තැවුල් වරින් වර ඇතිවේ. නිතර නිතර සිතේ සතුට නැතිවන ආකාරයට කරදර මතු වේ. වාසනාව අඩුවන කාලයක් බැවින් ශරීර ශක්තිය ද අඩු වනු ඇත. නින්දෙන් බය වේ. ඈත නෑයන් නිසා හෝ තමාගේ ළඟම හිතවතුන් නිසා කරදර හා පාඩු විඳීමට සිදු විය හැකි බැවින් කල්පනාවෙන් කටයුතු කළ යුතුය.

සුබ දිනය - අඟහරුවාදා

සුබ වර්ණය - කහ

ජය අංකය - 01