පරමාත්ම වූත්, පරම්බ්රහ්ම වූත්, පුරුෂෝත්තම ශ්රී විෂ්ණු පියාණන් වහන්සේ මේ මිහිතලය මත නපුර පාලනය කිරීම නවතා සෑම තැනකම සාමය හා සමෘද්ධිය ගෙන ඒම සඳහා අවතාර දහයක් ගත් බව අප හොඳින් දන්නා කරුණකි. නරසිම්හ අවතාරය යනු ශ්රී විෂ්ණු පියාණන්ගේ සිවුවන අවතාරය ලෙස සලකනු ලබන අතර, එතුමන් තම බැතිමතකු වූ ප්රහලාද් ආරක්ෂා කිරීම සඳහා අර්ධ – මිනිස්, අර්ධ සිංහයකුගේ ස්වරූපයක් ගත් බව සඳහන් වෙයි. සත්ය යුගයේදී කාශ්යප ඍෂිවරයාට සහ ඔහුගේ භාර්යාව වන දිති හට හිරණ්‍යාක්ෂ සහ හිරණ්‍යක්ෂිපු යන පුතුන් දෙදෙනෙක් සිටියේය. කල්යත්ම ඔවුන් දෙදෙනා සුරයන් හට මෙන්ම නරයන් හටද එක ලෙස හිරිහැර කරන්නට විය. ඔවුන්ගේ ම්ලේච්ඡ ක්‍රියාවලින් පීඩා විඳි දෙවිවරු ශ්‍රී විෂ්ණු පියාණන් හට කන්නලව් කොට මෙම සාහසික අසුර සහෝදරයන් දෙදෙනාව සංහාරය කරන මෙන් අයැද ඉල්ලා සිටියේය. පුරුෂෝත්තම ශ්‍රී විෂ්ණු පියාණන් තම බැතිමතුන්ගේ යාච්ඤාව අසා හිරණ්‍යාක්ෂය සංහාරය කිරීම සඳහා ශ්‍රීමත් නාරායනයන්ගේ දස අවතාරවලින් තුන්වැනි අවතාරය වන වරාහ අවතාරය ලෙස හදුන්වන යෝධ උෟරකුගේ ස්වරූපය ගත්තේය. ශ්‍රී වරාහ දෙවිඳුන් සහ හිරණ්‍යාක්ෂ අතර සටන - ශ්‍රී වරාහ දෙවිඳුන් සහ හිරණ්‍යාක්ෂ අතර දරුණු සටනක් ඇති වූ අතර එය මුළු ලෝකයම කම්පා කළේය. අවසානයේදී ශ්‍රී වරාහ දෙවිඳුන් තම දළවලින් හිරණ්‍යාක්ෂව කපා දැමීමට හැකි වූ අතර, පෘථිවිය (භූ දේවිය) තම දළ මත තබාගෙන ඇයව විශ්වයේ නියම ස්ථානයේ තබා ලෝකයේ සමතුලිතතාව යථා තත්ත්වයට පත් කළේය. මෙය දෙවියන්ට මෙන්ම මිනිසුන්ටද මහත් සහනයක් ගෙන දුන් නමුත් හිරණ්‍යාක්‍ෂගේ සොහොයුරා වන හිරණ්‍යක්‍ෂිපු තම සොහොයුරා මැරූ පළිය ගැනීමට දෙවියන් සහ මිනිසුන් සියල්ලන්ම බිය ගන්වමින් ලොවට අප්‍රමාණ විනාශයක් සිදු කළ බැවින් ඔවුන්ගේ හිරණ්‍යාක්ෂ සංහාරය කිරීමෙන් ඇති වූවා වූ සතුට කෙටි කලකට පමණක් පැවතුණි. හිරණ්‍යක්‍ෂිපු ලෝකයේ ඇති සියලු යහපත විනාශ කිරීමට තම අසුර හමුදාවට නායකත්වය දුන් නමුත් දේවතාවන්ගේ බලයට මුහුණ දීමට තරමක් අපහසු විය. පුරුෂෝත්තම ශ්‍රී විෂ්ණු පියාණන් විසින් දේවතාවන්ට උපකාර කරන බව හිරණ්‍යක්‍ෂිපු දැනගත් අතර, ඔහු ශ්‍රී විෂ්ණු දෙවියන්ගේ අවසානයට හේතුව වන බවට අධිෂ්ඨාන කර ගත්තේය. මේ නිසාවෙන් හිරණ්‍යක්‍ෂිපු, අමරණීයත්වයේ වරප්‍රසාදය ඉල්ලා පුරුෂෝත්තම ශ්‍රී විෂ්ණු පියාණන්ගේ නාභි කමලෙන් ජන්මය ලැබූ බ්‍රහ්ම දෙවියන්ට යාඥා කිරීමට තීරණය කළේය. ඔහු ඉක්මනින්ම තම ලෞකික ආශාවන් සියල්ල අමතක කර ඉන්ද්‍රිය සංවරයෙන් යුතුව බ්‍රහ්ම දෙවිඳුන් උදෙසා දැඩි ගෝර තපසක් ආරම්භ කරන්නට විය. ඉන්ද්ර දෙවියන් හිරණ්‍යක්ෂිපුගේ හමුදාව විනාශ කරයි. මේ අතර අසුරයන්ට නායකත්වය දෙන්නේ හිරණ්‍යක්ෂිපු විසින් නොවන බව ඉන්ද්ර දෙවියන්ට වැටහුණි. නායකයා නැති නිසා අසුරයන්ට පහර දීමට හොඳම අවස්ථාව මෙය බවත්, දේව හා අසුරයන් අතර යුද්ධය ජය ගැනීම පහසු වනු ඇති බවත් ඉන්ද්ර දෙවියන් සිතුවේය. එබැවින්, ඔහු තම පූර්ණ බලයෙන් අසුරයන්ට පහර දුන් අතර, අපේක්ෂා කළ පරිදි, ඔවුන්ගෙන් වැඩි දෙනෙක් මරා දමා යුද්ධය ජය ගැනීමට හැකි විය. මෙම සංග්‍රාමයේදී ඉන්ද්ර දෙවියන් හිරණ්‍යක්ෂිපුගේ මුළු අගනුවරම විනාශ කළ අතර ඔහුගේ මාලිගය වෙත ගමන් කිරීමට තීරණය කළේය. එහිදී ඔහුට හිරණ්‍යක්ෂිපුගේ බිරිය කායාදු හමු විය. හිරණ්‍යක්ෂිපු කවදා හෝ ප්‍රතිප්‍රහාර එල්ල කිරීමට තීරණය කළහොත් ඇයව සිරකරුවකු ලෙස ගෙන ප්‍රාණ ඇපකරුවකු ලෙස භාවිත කිරීමට ඔහු සිතුවේය. ඒ මොහොතේම නාරද මහා ඍෂිතුමා පැමිණ ඉන්ද්ර දෙවියන් සිදු කිරීමට ගිය අනර්ථය නතර කළේය. නාරද ඍෂිතුමා කෝපයෙන් ඉන්ද්‍රගෙන් ඇසුවේ, “ඇයි ඔබ බලහත්කාරයෙන් කාන්තාව සිරකරුවකු ලෙස ගෙන යන්නේ?” කියාය. හිරණ්‍යක්ෂිපු නැවතත් ඔහුට පහර දීමට තීරණය කළහොත් ඔහු ඇයව ප්‍රාණ ඇපකරුවකු ලෙස භාවිත කිරීමට යන බව ඉන්ද්ර දෙවියන් නාරද මහා ඍෂිතුමා හට පැවසීය. මෙය ඇසූ නාරද මුනි, අසුරයන් හා දේවතාවන් අතර ඇති වූ යුද්ධයේදී ඇය කිසිවකට සම්බන්ධ නොමැති බැවින් එම අවස්ථාවේදීම එම කාන්තාව නිදහස් කරන ලෙස ඉල්ලා සිටියේය. ඇය අහිංසක අසරණ ගැහැනියක් පමණක් බව ඉන්ද්ර දෙවියන්ට පැහැදිලි කළේය. ඉන්ද්ර දෙවිඳුන්ට ඇයට යන්න දීම හැර වෙනත් විකල්පයක් තිබුණේ නැත. ඔහු ඇයව නිදහස් කළ පසු, නාරද මහා ඍෂිතුමා ඇගෙන් ඇසුවේ ඇය හොඳින් දැයි, ඇය ඔහුට පැවසුවේ ඇය ටිකක් වෙව්ලමින් හා කම්පනයට පත් වූ නමුත් එසේ නොමැතිනම් ඇය හොඳින් සිටින බවයි. ඇය ගැබ්ගෙන ඇති බවද ඔහුට පැවසූ අතර, ඇයට යෑමට වෙනත් ස්ථානයක් නොමැති බැවින් නාරද මහා ඍෂිතුමා සමඟ නැවතී ඔහුගේ දියණිය මෙන් ඔහුට සේවය කිරීමට අවශ්ය බවය. නාරද මහා ඍෂිතුමා මෙය පිළිගත් අතර කායාදු නාරදයන්ගේ අසපුවේ වාසය කිරීමට පටන් ගත්තේය. නාරද ඇයට පුරුෂෝත්තම ශ්‍රී විෂ්ණු පියාණන් වහන්සේ ගැන කතන්දර කී අතර, ඔහුගේ කතාවලට සවන් දීමෙන් පසු ඇය විෂ්ණු දෙවියන් කෙරෙහි ඇල්මක් ඇති කර ගත්තාය. ඇගේ නූපන් දරුවාද කතන්දරවලට සවන් දීමට පුරුදුව සිටි අතර, ඔහුද විෂ්ණු දෙවියන්ගේ විශාලතම බැතිමතෙක් බවට පත් විය. මේ අතර, හිරණ්‍යක්‍ෂිපුගේ තපසින් ජනිත වූ තාපය දෙව්ලොවදී දේවතාවන්ට දැනෙන්නට තරම් දැඩි හා බලවත් විය. අවසානයේදී ඔවුන්ට තවදුරටත් රස්නය දරාගත නොහැකි වූ අතර බ්‍රහ්ම දෙවියන් වෙත ගොස් හිරණ්‍යක්ෂිපුගේ යාච්ඤාවලට අවනත වන ලෙස ඉල්ලා සිටියහ. බ්‍රහ්ම දෙවියන් හිරණ්‍යක්ෂිපුට වරම් දෙයි. බ්‍රහ්ම දෙවියන් හිරණ්‍යක්ෂිපුගේ භක්තිය ගැන සැබැවින්ම සතුටු වූ අතර ඔහු කැමති ඕනෑම වරයක් ඔහුට ලබා දෙන්නට තීරණය කළේය. ඔහුට අමරණීය වීමට අවශ්ය බව හිරණ්‍යක්ෂපු බ්‍රහ්ම දෙවිඳුන්ට කීවේය. බ්‍රහ්ම දෙවිදුන් ඔහුට පැවසුවේ එවැනි වරදානයක් පිරිනැමිය නොහැකි බවත්, එය ජීවිතයේ සමතුලිතතාවයේ පිළිවෙළ විකෘති කරන බවත්ය. මේ නිසාවෙන් ඉතා සූක්ෂ්ම ලෙස තම කපටිකමෙන් කල්පනා කර අන්තිමට හිරණ්‍යක්ෂිපුට සැලසුමක් සිතුණි. ඔහු බ්‍රහ්ම දෙවියන්ගෙන් ඉල්ලා සිටියේ “බ්‍රහ්ම විසින් නිර්මාණය කරන ලද කිසිම මිනිසකුට, දෙවියකුට හෝ සතකුට තමාව මරා දැමීමට ඉඩ නොදෙන වරයක් ලබා දෙන ලෙසයි. එසේම, කිසිවකුට ඔහුව දිවා කාලයේදී මෙන්ම රාත්‍රියේදී මරා දැමිය නොහැකි අතර ස්වර්ගයේ හෝ පොළොවේදී කිසිවකුට ඔහුව මරා දැමිය නොහැකිය. එසේම, කිසිවකුට ආයුධයකින් ඔහුව මරා දැමීමට හෝ ඔහුගේ නිවෙස තුළ හෝ පිටතදී ඔහුව මරා දැමිය නොහැක” වන ලෙස වරදානයක්ය. බොහෝ කල්පනා කිරීමෙන් පසු අවසානයේ බ්‍රහ්ම දෙවිඳුන් හිරණ්‍යක්ෂිපු හට ඔහු ඉල්ලා සිටි වරය ලබා දීමට තීරණය කළේය. ප්‍රීතියෙන් ඉපිල ගිය ඔහු නැවත තම රාජධානියට ගියේය. එහිදී තම රාජධානියට සිදු වී තිබෙන්නාවූ විපත දැක ශෝකයට පත් විය. මේ සියල්ලටම හේතුව වූ ඉන්ද්‍රගෙන් පළිගැනීමට ඔහු තීරණය කළේය. මේ නිසාවෙන් ඔහු දෙවිවරුන් සමඟ තනිවම සටන් කර ඔවුන්ව පරාජය කර දෙවියන්ව දේවලෝකයෙන් නෙරපා හැරියේය. ඉන්පසු ඔහු ස්වර්ගයේ පාලකයා බවට පත් විය. ප්‍රහ්ලාදයන් විෂ්ණු දෙවියන්ගේ සැබෑ බැතිමතෙක් විය. හිරණ්‍යක්ෂිපු තම බිරිය සහ පුතණුවන් සොයාගෙන ඔවුන්ව නැවත තම රාජධානියට ගෙන ආවේය. නපුරු හා නීච හිරණ්‍යක්ෂිපු මෙන් නොව, ඔහුගේ පුත් ප්‍රහ්ලාදයන්, ශ්‍රී විෂ්ණු දෙවියන්ගේ දැඩි බැතිමතකු වූ අතර නාරායනයන් හට ඔහු නිතරම යාච්ඤා කළේය. වරක් ප්‍රහ්ලාදයන් සමඟ කතා කරමින් සිටි හිරණ්‍යක්ෂිපු ඔහු විෂ්ණු දෙවියන්ට ප්‍රශංසා කරන අයුරු අසා පුදුමයට පත් විය. කෝපයට පත් ඔහු ප්‍රහ්ලාදගේ ගුරුවරයාට දඬුවම් කර ඔහු ගැන විමසිල්ලෙන් සිටින ලෙස ඉල්ලා සිටියේය. කාලයත් සමඟ ප්‍රහ්ලාදයන්ගේ විෂ්ණු භක්තිය වැඩි වීම නිසා හිරණ්‍යක්ෂිපු ප්‍රහ්ලාදයන් කෙරෙහි තව තවත් කෝපයට පත් විය. අවසානයේදී හිරණ්‍යක්ෂිපු හට එය තවදුරටත් දරාගත නොහැකි වූ අතර ප්‍රහ්ලාදයන්ව මරා දමන ලෙස ඔහුගේ ආරක්ෂකයන් හට අණ කොට සිටියේය. ආරක්ෂකයන් ඔහුව මරා දැමීමට අකැමැති වූ නමුදු හිරණ්‍යක්ෂිපුගේ අණට පිටින් යා නොහැකි නිසාවෙන් එයට එකඟ විය. එනමුත් ආරක්‍ෂකයන් ප්‍රහ්ලාදට එල්ල කරන සෑම පහරකින්ම ඔවුන්ගේ කඩු කැබලිවලට කැඩී ගිය අතර ප්‍රහ්ලාදට කිසිදු හානියක් සිදු නොවීය. තවත් වරෙක හිරණ්‍යක්ෂිපු ප්‍රහ්ලාදයන් හට දෂ්ට කිරීම සඳහා විෂ සහිත සර්පයන් කිහිප දෙනකු යවා සිටියද ඔහුට නාරායනයන්ගේ රැකවරණය නිසාවෙන් කිසිදු හානියක් නොවී සිටියේය. ඉන්පසු හිරණ්‍යක්ෂිපු මදකිපුණ අලි ඇතුන් ප්‍රහ්ලාදයන් දෙසට යවන්නට විය. නමුත් ශ්‍රී හරිගේ කරුණාවෙන් එම අලි ප්‍රහ්ලාදයන් හට පහර දුන්නේ නැත. මේ සියලු ක්‍රියාවන් ව්‍යර්ථ වූ තැන ඔහු තම සොහොයුරිය හෝලිකාට කතා කිරීමට තීරණය කළේය. හෝලිකා හට ආධි වෛෂ්ණව වූ ශිව දෙවිඳුන්ගෙන් ලැබූ වරයක් විය. ඇයට ගින්නට නොපිලිස්සෙන වස්ත්‍රයක් ශිව දෙවිඳුන්ගෙන් ලැබී තිබුණේය. මෙයින් ප්‍රයෝජනයක් ගෙන ප්‍රහ්ලාදයන් මරා දැමීමට හිරණ්‍යක්ෂිපු තම සහෝදරියට කීවේය. හෝලිකා ශිව දෙවිඳුන් දුන් වස්ත්රය හැඳ ප්‍රහ්ලාදයන්ව තම උකුළේ වාඩි කරවා තමා වට කොට ගිනි මැළයක් ගසා ඔහුව පුලුස්සා මරා දමන්න සැරසුනේය. සිදු වූයේ අදහාගත නොහැකි ආශ්චර්යවත් සිදුවීමකි. හෝලිකා ශිව දෙවියන් දුන් වස්ත්රය පැලඳගත්තේ ගින්නෙන් තමන් බේරී ප්‍රහ්ලාදයන් මරා දැමීමට වුවද සිදුවූයේ එහි අනිත් පැත්තයි. හෝලිකා පැලඳ සිටි නොපිලිස්සෙන වස්ත්රය හෝලිකාගෙන් ගැලවී ගොස් ප්‍රහ්ලාදයන් වටා එතුණි. මෙය දැක විමතියටත් කෝපයටත් පත් හෝලිකා ශිව දෙවිඳුන්ට අමතන්නට විය. ශිව දෙවියන්ට තමාට සිදු වූ විපතට ෙදාස් නඟන්නට විය. මේ මොහොතේදී දේවාතිදේව වූ මහාදේවයන් හෝලිකා ඉදිරියේ දර්ශනය වී මෙසේ පවසන්නට විය. “හෝලිකා, නුඹ නම් අනුවණයෙකි. විෂ්ණු දෙවිඳුන්ගේ බැතිමතකු වන මාගේ වරයක් යොදා තවත් විෂ්ණු දෙවිදුන්ගේ බැතිමතකු නසන්නට සැරසුණාද. එහි විපාකයයි ඔබ මේ පිලිස්සී මිය යෑමෙන් විඳින්නේ” යනුවෙනි. මේ සිදුවීමෙන් හිරණ්‍යක්ෂිපු දැඩි කෝපයකට පත් විය. ඔහුට කිසිවක් සිතාගත නොහැකි වූ අතර ඔහුගේ කෝපයේ උච්චතම අවස්ථාවට පැමිණ තිබුණි. ඔහු ප්‍රහ්ලාදයන්ව තම රජමැඳුරේ ආලින්දයට ඇදගෙන ගොස් “මෙතැන විෂ්ණු සිටිනවාද?” ඇසුවේය. “ශ්‍රීමත් නාරායනයන් වහන්සේ සෑම තැනකම සිටිනවා” යැයි ප්‍රහ්ලාදයන් ඔහුට පැවසූ අතර, හිරණ්‍යක්ෂිපු ප්‍රහ්ලාදට සමච්චල් කරමින් ඔවුන් අසල කණුවක තම ස්වාමීන් වහන්සේ වැඩ සිටිනවා දැයි විමසීය. ප්‍රහ්ලාද් ඔහුට පැවසුවේ ඔව් කියාය. කෝපයෙන් හිරණක්ෂිපු කණුවට පයින් ගැසූ අතර එයින් පරමාත්ම වූත්, පරබ්‍රහ්ම වූත්, පුරුෂෝත්තම ශ්‍රී විෂ්ණු පියාණන් වහන්සේ, අඩක් මනුෂ්‍යයෙක් හා අඩක් සිංහයෙක් වූ නරසිම්හ අවතාරය ගෙන මහා තේජසකින් රෞද්ර සහ උග්ර විලාසයකින් පහළ විය. ශ්‍රී විෂ්ණු දෙවියන් නරසිම්හ අවතාරයෙන් පෙනී සිටියි. නරසිම්හයන් ඝෝෂාකාරී හඬකින් කෑ ගසා ඔහු හිරණ්‍යක්ෂිපුව ඝාතනය කිරීමට මනුලොවට පැමිණි විෂ්ණු දෙවියන්ගේ සිවුවන අවතාරය බව පැවසීය. ශ්‍රී නරසිම්හ දෙවිඳුන් හිරණ්‍යක්‍ෂිපුව ග්‍රහණයක් මෙන් අල්ලාගෙන ඔහුගේ නිවෙසින් පිටත හෝ ඇතුළත නොවූ ෙදාරේ එළිපත්ත වෙත ඇදගෙන ගියේය. ඔහු අහසත් පොළොවත් නොවන ඔහුගේ උකුළ මත තබා කිසිදු ආයුධයක් භාවිත නොකර සවස් වරුවේ ඔහුගේ නියපොතුවලින් ඇන ඔහුව මරා දැමුවේය. අසුර සංහාරයෙන් පසු, ශ්‍රී නරසිම්හ දෙවිඳුන් මහා ඝෝෂාවක් කළ අතර, එය සියලු අසුරයන් බිය ගන්වන ලදී. කිසිවකු ශ්‍රී නරසිම්හ දෙවිඳුන් වෙත ළඟා වීමට එඩිතර වූයේ නැත. නමුත් ප්‍රහ්ලාදයන් ඔහුගේ දෑස්වල දැඩි භක්තියකින් ඔහු වෙත ගොස් ඔහුගේ ජීවිතය බේරා ගැනීම ගැන ඔහුට ස්තූති කළේය. ඔහුගේ පියා ගැන විමසූ විට, ශ්‍රී නරසිම්හ දෙවිඳුන් ඔහුට පැවසුවේ හිරණ්‍යක්ෂිපු යනු තමන් වහන්සේගේ ෙදාරටු පාලක විජය වන අතර ඔහු ශාපයකට ලක් වූ බවත් නැවත දෙව්ලොවට යෑමට තවත් උප්පත්ති තුනක් ගත යුතු බවත්ය. ප්‍රහ්ලාදයන් තම පියාගේ රාජධානියේ රජු බවට පත් කරන ලද අතර ඔහු ඉතා අවංකව සහ හොඳ හිතකින් පාලනය කළ අතර එය අසුරයන්ගේ මාර්ගයන් පවා වෙනස් කළේය. මේ අනුව පුරුෂෝත්තම ශ්‍රී විෂ්ණු පියාණන් වහන්සේ අර්ධ සිංහ, අර්ධ මිනිසකු වන නරසිම්හ ලෙස අවතාරය ගෙන ඇත්තේ තම පරම බැතිමතකු වන ප්‍රහ්ලාදයන්ව හිරණ්‍යක්ෂිපුගේ කෝපයෙන් බේරා ගැනීමට වන අතර, හිරණ්‍යක්ෂිපු හට ශාපයෙන් මිදීමේ යම් ප්‍රගතියක්ද ලබා දීමටය. එනිසා හිරණ්‍යක්ෂිපුව සිටි තම ෙදාරටු පාලකයා වූ විජයට උන්වහන්සේ සරණක් විය. එමඟින් නැවතත් ලෝකයේ අධර්මය දුරු කර ධර්මය ස්ථාපනය විය. මහා විෂ්ණු දෙවියන් තම බැතිමතුන්ගේ යහපත සහ මුළු ලෝකයේම යහපත සඳහා විවිධ ස්වරූපයන් ගෙන ඇත. මහා විෂ්ණු දෙවියන්ගේ සියලුම අවතාර අතර, නරසිංහ අවතාරය ඉන් දරුණුතම ස්වරූපය වේ. නරසිංහ දෙවියන් තම බැතිමතුන් අනතුරෙන් ගලවා ගැනීමට පෙනී සිටින බව පැවසේ. ආදි ශංකරාචාර්ය කාලි දේවියට පූජා කරන විට නරසිංහ දෙවියන් විසින් බේරා ගන්නා ලදී. පසුව ගුරු ආදි ශංකරාචාර්ය විසින් නරසිම්හ දෙවියන්ට කළ උපහාරයක් ලෙස ලක්ෂ්මි – නරසිංහ ස්තෝත්රය රචනා කරන ලදී. නරසිංහ දෙවියන් සාමාන්‍යයෙන් නිරූපණය කරනු ලබන්නේ අර්ධ මිනිසකු සහ අර්ධ සිංහයකු වන සත්ත්වයකු ලෙසය. ඔහුගේ මුහුණේ රුදුරු ඉරියව්වක් ඇති අතර දිගු හා තියුණු ඇඟිලි නිය ඇත. මේ ඇඟිලි නියපොතු ඔහු සතු එකම ආයුධයයි. ඔහු දරන ඉරියව්ව සහ ආයුධ මත පදනම්ව ඔහු ආකාර 74කට වඩා විස්තර කර ඇත. වඩාත් ප්‍රසිද්ධ වූ ආකාර නවයක් ඇත. මෙම නව දෙනා එකට නව නරසිංහ ලෙස හැඳින්වේ. 1. උග්ර නරසිම්හ, 2. ක්‍රොධ්ද නරසිම්හ, 3. මලෝල නරසිම්හ, 4. ජ්වාලා නරසිම්හ, 5. වරාහ නරසිම්හ, 6. භාර්ගව නරසිම්හ, 7. කරන්ජ නරසිම්හ, 8. යෝග නරසිම්හ, 9. ලක්ෂ්මි නරසිම්හ, උග්ර නරසිම්හ - “උග්ර” යන වදන රුදුරු යන්න ගම්ය කර ඇත. දෙවියන් නිරූපණය කර ඇත්තේ හිරණ්‍යක්ෂිපුගේ විනාශ වූ සිරුර, ඔහුගේ කඩා වැටුණු බෙල්ල සහ එළියට පැමිණි බඩවැල් අනුභව කරමින් සහ නියපොතුවල දවටාගෙන, සිරුර ඔහුගේ උකුළේ තබාගෙන සිටින රුදුරු ස්වරූපය ලෙසිනි. ප්‍රහ්ලාද ස්වාමීන් වහන්සේ ඉදිරියෙහි හිස නමා සිටගෙන සිටියි. විෂ්ණු දෙවිදුන් ගරුඬට සහ ආදි ශංකරාචාර්යයන්ට දර්ශනය කළේ මේ ආකාරයෙන් බව පැවසේ. ක්‍රොධද නරසිම්හ - මෙම ස්වරූපය මහා විෂ්ණු දෙවියන්ගේ තුන්වැනි අවතාරය වන වරාහයේ එකතුවකි. ඔහු දත් අතර භූදේවිය / ලෝකය අල්ලාගෙන සිටී. මා ලෝල නරසිම්හ - “මා” යනු ලක්ෂ්මි දේවිය සහ “ලෝල” යනු පෙම්වතියයි. නරසිංහ දෙවියන්ගේ මෙම ස්වරූපයේ මහා ලක්ෂ්මි දේවිය නිරූපණය කර ඇත. මෙය ස්වාමීන්ගේ සන්සුන් ස්වරූපයකි. ජ්වාලා නරසිම්හ - මෙය දරුණුතම ස්වරූපයයි. ඔහු අත් අටක් ඇති සිංහයකු ලෙස නිරූපණය කෙරේ. ඔහු අත් දෙකෙන් හිරණ්‍යක්ෂිපුගේ බඩ ඉරීමටද, බඩවැලේ ඇති මල්මාලා දෙකක්ද, අත් දෙකකින් හිරණ්‍යක්ෂිපු රඳවා තබා ගැනීමටද, අවසාන අත් දෙකෙන් ආයුධ අල්ලාගෙන සිටියි. වරාහ නරසිම්හ - නරසිංහ දෙවියන්ගේ මෙම ස්වරූපය ප්‍රහලාද් වර හෝ ශාන්ත නරසිංහ ලෙසද හැඳින්වේ. මෙම ස්වරූපය බොහෝ විට ලක්ෂ්මි දේවතාවිය හෝ මහා විෂ්ණු දෙවියන්ගේ වරාහ අවතාරය සමඟ නිරූපණය කෙරේ. භාර්ගව නරසිම්හ - පරශුරාම දෙවියන්ට නරසිංහ දෙවියන්ගේ ආශීර්වාදය ලැබූ අවස්ථාවෙහි පෙනී සිටි ස්වරූපය භාර්ගව නරසිංහ ලෙස හැඳින්වේ. මෙම ස්වරූපය උග්ර නරසිංහ ස්වරූපයට සමාන වේ. කරන්ජ නරසිම්හ - හනුමාන් දෙවියන් වරක් රාම දෙවියන් දැකීමට උපවාස කළේය. මහා විෂ්ණු දෙවියන් රාම වෙනුවට නරසිංහ දෙවියන් ලෙස පෙනී සිටියේය. නරසිංහ දෙවියන්ගේ ස්වරූපය රාම දෙවියන්ට සමාන ලෙස දර්ශනය විය. ඔහු දුන්න සහ ඊතලය අල්ලාගෙන සිටින අතර අනන්ත නම් නාගරජු තම හිස මත විරජමාන වෙයි. යෝග නරසිම්හ - මෙම ස්වරූපයේදී නරසිංහ දෙවියන් භාවනා ඉරියව්වක් දරයි. ඔහුගේ කකුල් හරස් කර ඇති අතර ඔහුගේ ඇස් වසා ඇත. ඔහුගේ දෑත් සාමය සංකේතවත් කරන යෝගී මුද්‍රාවක රැඳී තිබේ. නරසිංහ දෙවියන් තම බැතිමතකු වූ ප්‍රහ්ලාදට යෝගයේ මූලික කරුණු සියල්ල කියා දුන්නේ මේ ආකාරයෙන් බව පැවසේ. ලක්ෂ්මි නරසිම්හ - ලක්ෂ්මි නරසිංහ ස්වරූපය නරසිංහ දෙවියන්ගේ සන්සුන් නිරූපණයකි. දෙවිදුන් ඔහුගේ බිරිය වන ලක්ෂ්මිය සමඟ සිටින අවස්ථාව දර්ශනය කරයි. තවද නරසිම්හ දෙවියන් වඳින පුදන බැතිමතුන් හට හදි හූනියම් දෝෂ සහ අමනුෂ්ය දෝෂ නොවදින බවද ඉතා ප්‍රසිද්ධ කාරණයකි.