සිකුරු ග්‍රහයා 2021 වසරෙහි අගෝස්තු 11 වැනිදා පෙ.ව. 11.32ට කන්‍යා රාශිය තුළ නීච චලිතයක් ආරම්භ කරන අතර 2021 වසරෙහි සැප්තැම්බර් 6 වැනිදා පෙ.ව. 00.51 වන තෙක්ම තම නීච චලිතය පවත්වාගෙන යයි. සිකුරු ග්‍රහයා මෙසේ නීච ලෙස චලිත වීමට අනුව උපන්දින හිමියන් රැසකට විශේෂ මුදල් ගනුදෙනු පෙන්නුම් කෙරේ. 

ඒ අනුව 1979 වසරෙහි නොවැම්බර් 4 වැනිදාත්, 1980 මාර්තු 15 වැනිදාත් අතර කාලසීමාව තුළ කුමන හෝ දිනයක හෝ 1980 ජූලි 27 වැනිදාත් 1982 ඔක්තෝබර් 5 වැනිදාත් අතර කාලසීමාව තුළ කුමන හෝ දිනයක හෝ 1950 සැප්තැම්බර් 20 වැනිදාත් 1952 නොවැම්බර් 25 වැනිදාත් අතර කාලසීමාව තුළ කුමන හෝ දිනයක හෝ 1953 අප්‍රේල් 24 වැනිදාත් 1953 අගෝස්තු 21 වැනිදාත් අතර

 කාලසීමාවෙහි කුමන හෝ දිනයක හෝ උත්පත්තිය ලබා ඇති අයට 2021 වසරෙහි අගෝස්තු 11 වැනිදා පෙ.ව. 11.32ත් 2021 වසරෙහි සැප්තැම්බර් 6 වැනිදා පෙ.ව. 00.51ත් අතර කාලසීමාව තුළ විශේෂ මුදල් ගනුදෙනු, බැංකුවලින් ණය මුදල් ලබා ගැනීම් වැනි කටයුතු සාර්ථක වීම, කොටස් වෙළෙඳපොළ ආයෝජන වැනි කටයුතුවලින් ප්‍රතිලාභ ලැබීම, අතපසු වී පවතින වාහන ගනුදෙනු, ඉඩකඩම් ගනුදෙනු, සාර්ථක කරගැනීම ආදිය තුළින් ඇතිවන විශේෂ මුදල් ලාභ මෙන්ම බලාපොරොත්තු රහිත ලෙස තෑගි බෝග ලැබීම් ආදිය පෙන්නුම් කෙරේ. ඒ නිසා එම උපන්දින අතර කුමන හෝ දිනයක ඉපදී ඇති අය ඒ පිළිබඳව උනන්දු වීම සුදුසුය.

2021 වසරෙහි අගෝස්තු 17 වැනිදා පෙ.ව. 1.17ට රවි ග්‍රහයා සිංහ රාශියට පිවිසෙන අතර 2021 වසරෙහි සැප්තැම්බර් 17 වැනිදා පෙ.ව. 1.13 වන තෙක්ම තම සිංහ රාශි චලිතය පවත්වා ගෙන යයි. මෙම ග්‍රහ චලිතයට අනුව 2021 වසරෙහි අගෝස්තු 17 වැනිදා පෙ.ව. 1.17ත්, 2021 වසරෙහි සැප්තැම්බර් 17 වැනිදා පෙ.ව. 1.13ත් අතර කාලසීමාව තුළ දේශපාලන ක්ෂේත්‍රය යළිත් උණුසුම් වීමට ඉඩකඩ ඇති අතර මැතිවරණ පිළිබඳ කතිකාවක් ඇති වීමටද පාර්ලිමේන්තුව තුළ අණපනත් සම්මත වීමටද අමාත්‍ය මණ්ඩල සංශෝධන ආදියටද නව ගිවිසුම් ආදිය අස්සන් කිරීමටද එම කාලසීමාව තුළ තවදුරටත් ඉඩකඩ පවතී.

2021 වසරෙහි අගෝස්තු 11 වැනිදා පෙ.ව. 6.51ට බුධ සහ ගුරු යන ග්‍රහයන් නියම ලෙසම සප්තම වන බව පෙනේ. මෙය ප්‍රබල ඥාන යෝගයකි. මෙම ඥාන යෝගයට අනුව 2021 වසරෙහි අගෝස්තු 11 වැනිදා සහ ඒ ආශ්‍රිත දිනවල උපත ලබන දරුවන් අනාගතයේදී උගතුන්, බුද්ධිමතුන් බවට පත්වනු ඇත.

2021 වසරෙහි අගෝස්තු 19 ආශ්‍රිත දිනවල යුරේනස් ග්‍රහයා වක්‍ර චලිතයක් කරා පිවිසෙයි. පිපිරුම් කාරක ග්‍රහයකු වන යුරේනස් මෙසේ වක්‍ර වීමට අනුව 2021 වසරෙහි අගෝස්තු 19 ට පෙර සහ 2021 වසරෙහි අගෝස්තු 19 වැනිදායින් පසුව එළැඹෙන දින 3 තුළ අත්වැරදීම්වලින් සිදුවන පිපිරීම්, ගිනි ගැනීම්, රිය අනතුරු, බලශක්තිය හා සම්බන්ධ අනතුරු සහ වෙනත් හදිසි අනතුරුවල වැඩිවීමක් සිදුවිය හැකි බැවින් වෙනදාට වඩා ඉතා පරීක්ෂාකාරීව කාලය ගත කිරීම නුවණට හුරුය.

අප විසින් 2021 වසරෙහි ජූලි 11 වැනිදා 'තරුපති' අතිරේකයෙහි පළ කළ ලිපියෙහි පළමු ඡේදයෙන් 2021 වසරෙහි ජූලි 20 වැනිදාත් 2021 වසරෙහි සැප්තැම්බර් 6 වැනිදාත් අතර කාලසීමාව තුළ ශ්‍රී  ලංකාවෙන් වටිනා මැණික් වර්ග හමුවන බව අනාවැකි පළ කරන ලදී. අප අනාවැකි සඳහන් කළ පරිදිම ශ්‍රී  ලංකාවෙන් ලොව විශාලතම මැණික් පොකුර හමුවූ බවටද එහි ඇස්තමේන්තු වටිනාකම ඇමෙරිකානු ඩොලර් මිලියන දෙසීයක් බවටද සඳහන් වූ විශ්මයජනක ප්‍රවෘත්තිය 2021 වසරෙහි ජූලි 27 වැනිදා මාධ්‍ය මඟින් වාර්තා කරන ලදී.